მომავალი მედიკოსებისთვის კარდიოქირურგიული ვორქშოპი „CardioCore“ ჩატარდა

12 ივლისს, ორგანიზაცია MCO-ის ორგანიზებით, გაიმართა მასშტაბური ვორქშოპი - „CardioCore: კარდიოლოგიური ანატომია და ქირურგიული უნარები“, რომელშიც მონაწილეობა კავკასიის საერთაშორისო უნივერსიტეტის მედიცინის ფაკულტეტის 85-მდე უცხოელმა სტუდენტმა მიიღო. 

ინტენსიური პროგრამა სრულად იყო დატვირთული როგორც თეორიული, ისე უნიკალური პრაქტიკული კომპონენტებით. ღონისძიება კავკასიის საერთაშორისო უნივერსიტეტის ლექტორის, ექიმ მარიამ თეთრაძის სალექციო კურსით გაიხსნა. მან სტუდენტებს გულის ანატომიისა და მისი კლინიკური მნიშვნელობის შესახებ დეტალური ინფორმაცია მიაწოდა. ლექციის დასრულებისთანავე, მიღებული ცოდნის განსამტკიცებლად, ინტერაქციული ქვიზი ჩატარდა.

ვორქშოპის ერთ-ერთ მთავარ სიახლეს 3D ვიზუალიზაციის პროგრამის გამოყენება წარმოადგენდა. მისი მეშვეობით სტუდენტებმა გულის ანატომია ინტერაქციულ, სამგანზომილებიან სივრცეში შეისწავლეს, რამაც თეორიული მასალის აღქმა კიდევ უფრო გაამარტივა. ღონისძიების ფარგლებში სტუდენტებს პროფესიონალების მეთვალყურეობის ქვეშ, უშუალოდ გულზე მუშაობისა და კლინიკური უნარ-ჩვევების ათვისების შესაძლებლობა მიეცათ.

პრაქტიკული მუშაობის პარალელურად, სპეციალური ინტერაქციული ჯგუფური აქტივობებიც მოეწყო, რამაც სწავლის პროცესი უფრო დინამიკური და სახალისო გახადა. სემინარი ექიმ ალექსანდრე ეიობასის მოხსენებითა და კითხვა-პასუხის სესიით დასრულდა, სადაც სტუდენტებმა მათთვის საინტერესო კლინიკურ შემთხვევებზე ამომწურავი პასუხები მიიღეს.

ღონისძიების დასასრულს საზეიმო ცერემონია გაიმართა, სადაც ორგანიზატორებმა ყველა მონაწილეს სამახსოვრო საჩუქრები გადასცეს. ორგანიზატორების თქმით, პროექტმა მოლოდინს გადააჭარბა - სტუდენტებისგან მიღებული მაღალი შეფასებები ადასტურებს, რომ მსგავსი პრაქტიკული ვორქშოპები უმნიშვნელოვანესია მომავალი პროფესიონალების ჩამოყალიბებისთვის. „CardioCore“-ის გუნდი მადლობას უხდის მხარდამჭერებს პარტნიორობისთვის და სამომავლოდ კიდევ არაერთ საგანმანათლებლო ინიციატივას აანონსებს.