ლექცია - „პაციენტის უფლებები და ექიმის პროფესიული პასუხისმგებლობა თანამედროვე სამედიცინო პრაქტიკაში“

27 მარტს, კავკასიის საერთაშორისო უნივერსიტეტში მედიცინის ფაკულტეტის ორგანიზებით გაიმართა ლექცია თემაზე - „პაციენტის უფლებები და ექიმის პროფესიული პასუხისმგებლობა თანამედროვე სამედიცინო პრაქტიკაში“. 
შეხვედრას უძღვებოდა გიორგი ჩერქეზია - სასამართლო მედიატორი და ადვოკატი; სამედიცინო აკადემია Doctor’s-ის „სამედიცინო სამართლის კურსის“ ლექტორი და საერთაშორისო საკონსულტაციო კომპანია Black Sea Law Group-ის მმართველი პარტნიორი.

ლექციაზე აღინიშნა, რომ დღევანდელ რეალობაში მედიცინა აღარ არის მხოლოდ კლინიკური ცოდნისა და პრაქტიკული უნარების სფერო. ის გახდა მრავალმხრივი სივრცე, სადაც გადამწყვეტ მნიშვნელობას იძენს სამართლებრივი, ეთიკური და კომუნიკაციური ასპექტები. ხაზგასმით აღინიშნა, რომ პაციენტი აღარ არის მხოლოდ სამკურნალო პროცესის ობიექტი - ის არის უფლებებით აღჭურვილი, ინფორმირებული და აქტიური მონაწილე, რის გამოც პაციენტის უფლებების დაცვა და ექიმის მოვალეობების სწორად გააზრება თანამედროვე მედიკოსის პროფესიული იდენტობის მნიშვნელოვანი ნაწილია.

ლექციის ფარგლებში მომხსენებელმა დეტალურად ისაუბრა ექიმის პროფესიულ უფლებებსა და პასუხისმგებლობაზე, მათ შორის სამოქალაქო, ადმინისტრაციულ და სისხლისსამართლებრივ საკითხებზე. ყურადღება დაეთმო ასევე პაციენტის უფლებების დაცვას, სამედიცინო სფეროში შრომით ურთიერთობებს, პროფესიული ეთიკის მნიშვნელობასა და რეალური პრაქტიკული ქეისების განხილვას.

შეხვედრა ინტერაქტიულ ფორმატში წარიმართა, დამსწრე სტუდენტებსა და დაინტერესებულ პირებს კი შესაძლებლობა ჰქონდათ პრაქტიკოსი სპეციალისტისგან მიეღოთ ცოდნა თანამედროვე სამედიცინო სამართლის აქტუალურ საკითხებზე.

ლექციის ორგანიზებაში მონაწილეობა მიიღეს კავკასიის საერთაშორისო უნივერსიტეტის პროფესორებმა ლელა გრიგოლიამ და ვერა ხუნძაკიშვილმა.