CIU-ს ისრაელიდან მკვლევართა ჯგუფი ეწვია

12-15 ოქტომბერს კავკასიის საერთაშორისო უნივერსიტეტის მევენახეობა-მეღვინეობის ფაკულტეტმა ისრაელიდან, არილის უნივერსიტეტის მევენახეობა-მეღვინეობის ინსტიტუტის მკვლევართა ჯგუფს უმასპინძლა. სამეცნიერო დელეგაციას პროფესორი შივი დრორი (Shivi Drori) ხელმძღვანელობდა, რომელთან ერთადაც სამუშაო პროცესში მკვლევრები - ლიჰი ჰოკი (Lihi Hoch) და იაელ ლევ მირონი (Yahel Lev Miron) მონაწილეობდნენ.

ვიზიტის ფარგლებში პროფესორი შივი დრორი კავკასიის საერთაშორისო უნივერსიტეტის რექტორს, კახაბერ კორძაიას შეხვდა. შეხვედრაზე მხარეებმა მიმდინარე სამუშაოები შეაჯამეს და სამომავლო ერთობლივი კვლევების დეტალები განიხილეს.

აღსანიშნავია, რომ სამეცნიერო პარტნიორობა ორ ინსტიტუციას შორის გასულ წელს დაიწყო, როდესაც ლიჰი ჰოკის პირველი ვიზიტის ფარგლებში საფუძველი ჩაეყარა ქართული და ებრაული ვაზის ჯიშებისა და ველური ფორმების შედარებით ენოლოგიურ შესწავლას. პირველ ეტაპზე ჩატარებულმა მოსინჯვითმა კვლევებმა მეცნიერებს საშუალება მისცა, ერთობლივი მეთოდიკა შეემუშავებინათ და კვლევის დეტალები დაეზუსტებინათ.

წლევანდელი ვიზიტი ამ თანამშრომლობის გაღრმავებისა და მასშტაბების გაფართოების მნიშვნელოვანი ეტაპი გახდა. მხარეებმა მნიშვნელოვნად გაზარდეს შესასწავლი გენოტიპების სპექტრი და რაოდენობა, ასევე დახვეწეს კვლევის მეთოდები.