მემორანდუმი კსუ-სა და ’’Ventures Agile Precis“-ს შორის

18 მაისს,  კავკასიის საერთაშორისო უნივერსიტეტის რექტორმა კახაბერ კორძაიამ და  ’’Ventures Agile Precis“-ის დამფუძნებელმა და პრეზიდენტმა შონ ჰამილტონმა ურთიერთთანამშრომლობის მემორანდუმს მოაწერეს ხელი. მხარეებმა თანამშრომლობის სურვილი მიმდინარე წლის 16 მარტს გამოთქვეს, როდესაც ორგანიზაციის მმართველმა კსუ-ს წარმომადგენლებს ორგანიზაციის მიზნები, ამოცანები და საქმიანობის სფერო გააცნო.

ორგანიზაცია მცირე და საშუალო ბიზნესის წარმომადგენლებს ადამიანური რესურსით ამარაგებს  და მსოფლიო სამუშაო ბაზარზე პოტენციური თანამშრომლების რეკტურიტებას ეწევა. ამ გზით, VAP ცდილობს დასაქმების პრობლემის მოგვარებაში დიდი როლი ითამაშოს და მსოფლიო მასშტაბით ეკონომიკის განვითარებასა და ზრდას ხელი შეუწყოს.

ორგანიზაცია უმაღლეს საგანმანათლებლო დაწესებულებებთანაც მჭიდროდ თანამშრომლობს და ნიჭიერი, ლიდერობის უნარის მქონე სტუდენტებით ინტერესდება.  კსუ-სა და ’’Ventures Agile Precis“-ს შორის გაფორმებული მემორანდუმის პირობებით, კსუ-ს წარმატებულ სტუდენტებს საშუალება აქვთ აშშ-ში არსებულ სხვადასხვა კომპანიაში სტაჟირება გაიარონ და უნარ-ჩვევები დახვეწონ.