„ქართული დიპლომატიის კვირეული“ მიხეილ უკლებას ლექციით გაიხსნა

11 ნოემბერს კავკასიის საერთაშორისო უნივერსიტეტის სოციალურ და ჰუმანიტარულ მეცნიერებათა ფაკულტეტის ორგანიზებით „ქართული დიპლომატიის კვირეული“ გაიხსნა.

კვირეული საერთაშორისო პოლიტიკის მკვლევარისა და ელჩის, მიხეილ უკლებას ლექციით გაიხსნა თემაზე: „ქართული დიპლომატიის უახლესი ისტორია“.

სპიკერმა მიმოიხილა საქართველოს დიპლომატიური ურთიერთობების დამყარების ქრონოლოგია, საერთაშორისო ორგანიზაციებში საქართველოს გაწევრიანების პროცესი, საქართველოს დიპლომატიური წარმომადგენლობები და საკონსულო დაწესებულებები, ლექციის დასასრულს კი აუდიტორიის კითხვებს უპასუხა.

ლექციის დაწყებამდე სტუმარსა და დამსწრე აუდიტორიას კავკასიის საერთაშორისო უნივერსიტეტის სოციალურ და ჰუმანიტარულ მეცნიერებათა ფაკულტეტის დეკანის მოადგილე, საერთაშორისო ურთიერთობების საბაკალავრო პროგრამის ხელმძღვანელი ალიკა გუჩუა მიესალმა და ყურადღება კვირეულის თემატიკის მნიშვნელობასა და დიპლომატიის როლზე გაამახვილა.

ცნობისთვის, ქართული დიპლომატიის პროფესიული დღის დაწესება ქართველი მწერლისა და საზოგადო მოღვაწის, სულხან-საბა ორბელიანის დაბადების დღეს (3 ნოემბერი) უკავშირდება.