„ერთი უნივერსიტეტი, ბევრი ქვეყანა“ - კულტურათაშორისი ღონისძიება

14 მაისს, კავკასიის საერთაშორისო უნივერსიტეტში კულტურათაშორისი ღონისძიება - „ერთი უნივერსიტეტი, ბევრი ქვეყანა“ - გაიმართა. აღნიშნული პროექტი უნივერსიტეტის საერთაშორისო ურთიერთობების დეპარტამენტის მარკეტინგისა და უცხოელ სტუდენტთა ინტეგრაციის სამსახურის, ასევე სტუდენტ მენტორთა სამსახურის ორგანიზებით მოეწყო.

დღის ფარგლებში, ქართველმა და უცხოელმა სტუდენტებმა დამსწრე საზოგადოებას საკუთარი ქვეყნების ისტორია, კულტურა, ტრადიციები და ღირებულებები გააცნეს. პროგრამაში მონაწილეობა მიიღო 6 უცხო ქვეყნის წარმომადგენელმა, ხოლო მასპინძელი ქვეყანა - საქართველო, სტუდენტთა ორმა ჯგუფმა წარადგინა. პრეზენტაციები დაეთმო ქვეყნებს შორის კულტურული მრავალფეროვნების მნიშვნელობის ხაზგასმას.

ღონისძიების დასკვნით ნაწილში, ორგანიზატორებმა შეაჯამეს შეხვედრის შედეგები. პროექტში მონაწილე ყველა სტუდენტს, კულტურული თვითმყოფადობის პრეზენტაციისა და აქტიური ჩართულობისთვის, ოფიციალურად გადაეცა სერტიფიკატები და სამახსოვრო საჩუქრები.

ღონისძიებას მოდერაცია გაუწიეს CIU-ს საერთაშორისო ურთიერთობების დეპარტამენტის უფროსმა სვეტლანა კირაკოსიანმა და ახალგაზრდობის, სპორტისა და კულტურის სამსახურის სპეციალისტმა და სტუდენტ-მენტორთა სამსახურის ხელმძღვანელმა თათია კოკობინაძემ.

ორგანიზატორთა განცხადებით, უნივერსიტეტის ბაზაზე მსგავსი აქტივობები ხელს უწყობს საგანმანათლებლო სივრცეში სხვადასხვა კულტურისა და ტრადიციის მქონე სტუდენტთა ინტეგრაციასა და კოლაბორაციას.