ჩაერთე სისხლის უანგარო დონაციის აქციაში

14 მაისს, 11-დან 15 საათამდე, კსუ-ს კლინიკური უნარ-ჩვევების ცენტრში, „სისხლის გადასხმის საქალაქო სადგური“ სისხლის უანგარო დონაციის აქციას გამართავს.

იმისათვის, რომ გახდე დონორი უნდა იცოდე შემდეგი:

სისხლის დონაცია არის პროცესი, როდესაც ჯანმრთელი ადამიანი გასცემს სისხლს.

სისხლის დონორობა აბსოლუტურად უსაფრთხოა ჯანმრთელობისათვის.

სისხლის ხელმეორედ ჩაბარება შეიძლება 2 თვის შემდეგ.

სისხლის დონორი შეიძლება გახდეს ნებისმიერი ჯანმრთელი ადამიანი 18-დან 65 წლამდე, თუ:

• თქვენი წონა 50 კგ და მეტია;
• არ გაქვთ გადატანილი ვირუსული ჰეპატიტი B და C, შიდსი, სიფილისი;
• არ ხართ დაავადებული მალარიით;
• არ ხართ ნარკოტიკების მომხმარებელი.

ბოლო 3 თვის განმავლობაში:

• არ გაქვთ გადატანილი ქირურგიული ოპერაცია;
• 2 თვის მანძილზე არ გაგიკეთებიათ ტატუ;
• არ გქონიათ სხვის სისხლთან კონტაქტი;
• ქალებს ბოლო 6 თვის მანძილზე არ ჰქონიათ ორსულობა.

დონაციის დღეს, დონორი უნდა იყოს პრაქტიკულად ჯანმრთელი:

• არ უნდა ჰქონდეს სიცხე.

სისხლის დონორმა:

• დონაციის თანხმობის ფორმაში შეტანილ ყველა შეკითხვას გულახდილად უნდა გასცეს პასუხი;
• სისხლის ჩაბარების დღეს უმჯობესია, დილით მსუბუქად წაიხემსოს და მიიღოს ტკბილი ჩაი;
• სისხლის ჩაბარების დღეს თავი შეიკავოს ალკოჰოლის მიღებისგან;
• დონაციის დღეს დონორის იდენტიფიკაციის მიზნით, თან უნდა იქონიოს პირადობის დამადასტურებელი მოწობა.

სისხლის უანგარო დონაციის აქცია ჩატარდება დეცენტრალიზებულად - თქვენთან ადგილზე მოსვლით. ბრიგადის შემადგენლობაშია: ექიმი ტრანსფუზიოლოგი, ექიმი ლაბორანტი, ექსფუზიონისტი. სისხლის ჩაბარების წინ ტარდება გამოკვლევა სისხლის ჯგუფზე და რეზუსზე, ჰემოგლობინზე.

ჩაბარებულ სისხლს უტარდება გამოკვლევა სისხლის გზით გადამდებ ინფექციებზე: აივ ინფექცია/შიდსზე, B და C ჰეპატიტებზე, ათაშანგზე.

გამოკვლევის შედეგები მოგეწოდებათ ინდივიდუალურად, დახურულ კონვერტებში.