„სტიპენდიით დაწყებული სტარტაპი“ - შეხვედრა ბიზნესინკუბატორში

კავკასიის საერთაშორისო უნივერსიტეტის ბიზნესინკუბატორმა ინსპირაციულ შეხვედრას უმასპინძლა თემაზე: „სტიპენდიით დაწყებული სტარტაპი“. ღონისძიება, რომელსაც სტარტაპერი და მარკეტერი მარიამ ჭანკოტაძე უძღვებოდა, მიზნად ისახავდა სტუდენტებში სამეწარმეო სულისკვეთების გაღვივებასა და იმის ჩვენებას, რომ დიდი იდეების რეალიზება მცირე ფინანსური რესურსითაც არის შესაძლებელი. 

მარიამ ჭანკოტაძემ დამსწრე საზოგადოებას საკუთარი უნიკალური გამოცდილება გაუზიარა და დეტალურად ისაუბრა იმ გზაზე, რომელიც სტიპენდიის თანხით დაწყებული სტარტაპიდან დღევანდელობამდე გაიარა. მან აღნიშნა, რომ შესაძლებლობები ყოველთვის ბევრად დიდია, ვიდრე ერთი შეხედვით ჩანს, ამიტომ პირველ ნაბიჯებს ყოყმანი არ უხდება და საკუთარი თავის რწმენა ხშირად ყველაზე ძლიერი „ინვესტიციაა“ ნებისმიერი დამწყები მეწარმისთვის.

სპიკერმა ყურადღება გაამახვილა პრინციპზე „მიუახლოვდი“, რაც იმას ნიშნავს, რომ საქმის რეალურად დაწყების შემდეგ ყველაფერი ბევრად უფრო მარტივი ხდება. მან სტუდენტებს მოუწოდა, შეცდომები აღიქვან როგორც გზის აუცილებელი ნაწილი და არა როგორც დაბრკოლება, და იდეების ქმედებად გადაქცევა ხვალისთვის არ გადადონ.

ღონისძიებას მოდერაცია გაუწია ბიზნესინკუბატორი ხელმძღვანელმა ია ნადირაშვილმა. შეხვედრა, რომელიც პრაქტიკულ რჩევებსა და რეალურ ისტორიებს აერთიანებდა, ინტერაქტიულ რეჟიმში წარიმართა. პრეზენტაციის დასრულების შემდეგ სტუდენტებს საშუალება ჰქონდათ, სპიკერისთვის მათთვის საინტერესო კითხვები დაესვათ.