ეროვნული სამოსის დღისადმი მიძღვნილი ღონისძიება

კავკასიის საერთაშორისო უნივერსიტეტში საქართველოს ეროვნული სამოსის დღისადმი მიძღვნილი შემოქმედებითი საღამო გაიმართა. 

აღნიშნული ინიციატივა უნივერსიტეტის საერთაშორისო ურთიერთობების დეპარტამენტის მარკეტინგისა და უცხოელ სტუდენტთა ინტეგრაციის სამსახურისა და სტუდენტ მენტორთა სამსახურის ერთობლივი ორგანიზებით განხორციელდა. 

ღონისძიებაზე, რომელშიც ქართველი და უცხოელი სტუდენტები მონაწილეობდნენ, განსაკუთრებული აქცენტი ქართული ეროვნული სამოსის, ტრადიციული მუსიკისა და ცეკვის პოპულარიზაციაზე გაკეთდა. აღსანიშნავია, რომ უცხოელმა სტუდენტებმა განსაკუთრებული ინტერესი და პატივისცემა გამოხატეს მასპინძელი ქვეყნის კულტურული მემკვიდრეობის მიმართ.

პროგრამის ფარგლებში ქართველმა სტუდენტებმა სამი ტრადიციული ცეკვა შეასრულეს: „დავლური“ (ოპერიდან „დაისი“); „ლაზური“; „მთიულური“, რომლის შესრულებაშიც, ქართველ სტუდენტებთან ერთად, წარმოშობით ინდოელი სტუდენტიც ჩაერთო.

მუსიკალურ გაფორმებაზე იზრუნა კავკასიის საერთაშორისო უნივერსიტეტის ანსამბლმა „კავკასიელი“, ბეჟან წინწალაშვილის ხელმძღვანელობით, რომელმაც დამსწრე საზოგადოებას ქართული ტრადიციული რეპერტუარი წარუდგინა.

ღონისძიებაზე ქართულ კულტურასთან ერთად წარმოდგენილი იყო სხვადასხვა ქვეყნის ტრადიციებიც. კერძოდ, ლიბანელმა, სუდანელმა და ინდოელმა სტუდენტებმა საკუთარი ეროვნული ცეკვები შეასრულეს და დამსწრე აუდიტორიას თავიანთი ქვეყნების კულტურული თვითმყოფადობა გააცნეს.

საღამოს მოდერაციას უძღვებოდა ახალგაზრდობის, სპორტისა და კულტურის სამსახურის სპეციალისტი, სტუდენტ-მენტორთა სამსახურის ხელმძღვანელი, თათია კოკობინაძე  და ვიცე-მენტორი ნეგისადათ მოზაფარნეზადი. 

ორგანიზატორების შეფასებით, მსგავსი აქტივობები მნიშვნელოვნად უწყობს ხელს უნივერსიტეტში ინტერნაციონალიზაციის პროცესს, ამყარებს მეგობრულ კავშირებს სხვადასხვა კულტურის წარმომადგენლებს შორის და ქმნის ერთიან, მულტიკულტურულ საგანმანათლებლო სივრცეს.