საველე სიმულაციური სწავლება CIU-ში

კავკასიის საერთაშორისო უნივერსიტეტის კლინიკური უნარ-ჩვევების ცენტრის ორგანიზებით საველე სიმულაციური სწავლება ჩატარდა, რომელშიც ინგლისურენოვანი პროგრამის 50 სტუდენტი მონაწილეობდა.

სწავლება წინასწარ შემუშავებულ კლინიკურ სცენარებს ეფუძნებოდა, რომლის ფარგლებშიც მონაწილეებს რეალურ გარემოსთან მაქსიმალურად მიახლოებულ პირობებში უმოკლეს დროში უნდა გაეწიათ იმიტირებული დაზარალებულებისთვის პირველადი სამედიცინო დახმარება.

აქტივობის მიზანი იყო სტუდენტებში გადაუდებელი დახმარების პრაქტიკული უნარების, კლინიკური გადაწყვეტილების მიღების, ეფექტური გუნდური მუშაობისა და კრიტიკულ სიტუაციებში სწრაფი და სწორი რეაგირების უნარის განვითარება.

საველე სიმულაციურმა სწავლებამ მონაწილეებს შესაძლებლობა მისცა, უსაფრთხო სასწავლო გარემოში პრაქტიკულად გამოეყენებინათ მიღებული თეორიული ცოდნა და კიდევ უფრო განევითარებინათ პროფესიული კომპეტენციები, რომლებიც აუცილებელია მომავალი სამედიცინო პრაქტიკისთვის.