საჯარო შეხვედრა თემაზე - „მედიაწიგნიერება“

კავკასიის საერთაშორისო უნივერსიტეტის უწყვეტი განათლებისა და კარიერული განვითარების სამსახურის / სოციალურ და ჰუმანიტარულ მეცნიერებათა ფაკულტეტის ორგანიზებით, უნივერსიტეტის ბიბლიოთეკაში გაიმართა საჯარო შეხვედრა თემაზე - „მედიაწიგნიერება“.

შეხვედრაზე მოწვეულმა მომხსენებლებმა საკითხი სხვადასხვა სამეცნიერო და პრაქტიკული პრიზმიდან განიხილეს. პროფესორმა ზაზა ცოტნიაშვილმა ყურადღება გაამახვილა გენერაციული ხელოვნური ინტელექტის (AI) ორმაგ ბუნებაზე - როგორც თანამედროვე საზოგადოების წინაშე არსებულ შესაძლებლობასა და, ამავდროულად, გამოწვევაზე. მან აღნიშნა, რომ ტექნოლოგიური პროგრესის პარალელურად მნიშვნელოვნად იზრდება დეზინფორმაციული ნაკადების მართვისა და ყალბი კონტენტის გავრცელების რისკები. კავკასიის საერთაშორისო უნივერსიტეტის ბიბლიოთეკის ხელმძღვანელმა, თამარ ქავთარაძემ კი ციფრულ ეპოქაში ვერიფიცირებული და სანდო წყაროების იდენტიფიცირების მნიშვნელობაზე, ასევე აკადემიური კეთილსინდისიერების სტანდარტების დაცვაზე ისაუბრა.

კვლევისა და საჯარო დისკუსიის მიზანს ფართო საზოგადოებაში მედიაწიგნიერების კომპეტენციების ამაღლების ხელშეწყობა წარმოადგენდა, რაც თანამედროვე ციფრულ გარემოში ინფორმაციის კრიტიკული გააზრებისა და მისი სანდოობის შეფასების მნიშვნელოვანი წინაპირობაა. გლობალური ციფრული ტრანსფორმაციისა და დეზინფორმაციული ნაკადების ზრდის პირობებში, აღნიშნული საკითხი სცილდება ვიწრო აკადემიურ ჩარჩოებს და სოციალური მდგრადობის უზრუნველყოფის ერთ-ერთ მნიშვნელოვან ელემენტად გვევლინება.

შეხვედრის ფარგლებში განსაკუთრებული ყურადღება დაეთმო იმ პრაქტიკულ და მეთოდოლოგიურ ინსტრუმენტებს, რომლებიც საზოგადოებას საინფორმაციო მანიპულაციების პრევენციაში, წყაროების კრიტიკულ შეფასებასა და თანამედროვე ტექნოლოგიურ რეალობასთან ეფექტიან ადაპტაციაში ეხმარება.