საჯარო ლექცია პროექტების მენეჯმენტის შესახებ

კავკასიის საერთაშორისო უნივერსიტეტში ბიზნესისა და ტექნოლოგიების ფაკულტეტის ორგანიზებით საჯარო ლექცია გაიმართა თემაზე - „პროექტების მენეჯერი: მითები, რეალობა და შენი შანსი ამ პროფესიაში“. 

ლექციას უძღვებოდა ნანა ლობჯანიძე - კავკასიის საერთაშორისო უნივერსიტეტის საერთაშორისო ბიზნესის მენეჯმენტის სამაგისტრო პროგრამის სტუდენტი, PMP სერტიფიცირებული პროექტის მენეჯერი და PMI თბილისი, საქართველოს წარმომადგენლობის კომუნიკაციების, მარკეტინგისა და სოციალური მედიის დირექტორი.

შეხვედრის ფარგლებში განხილული იყო პროექტების მენეჯერის პროფესიის რეალური სპეციფიკა, გავრცელებული სტერეოტიპები და თანამედროვე შრომით ბაზარზე არსებული შესაძლებლობები. განსაკუთრებული ყურადღება დაეთმო იმ უნარებსა და კომპეტენციებს, რომლებიც აუცილებელია აღნიშნულ სფეროში წარმატებული კარიერის დასაწყებად და განვითარებისთვის.

სპიკერმა სტუდენტებს საკუთარი პროფესიული გამოცდილება გაუზიარა და ისაუბრა კარიერული გზის დაგეგმვის მნიშვნელობაზე, უნივერსიტეტიდან პირველი პროფესიული ნაბიჯების გადადგმის პროცესსა და იმ პრაქტიკულ გამოწვევებზე, რომლებიც პროექტების მენეჯერის საქმიანობას ახლავს თან.

ლექცია ინტერაქციულ ფორმატში წარიმართა და მონაწილეებს შესაძლებლობა ჰქონდათ, სპიკერისთვის მათთვის საინტერესო კითხვები დაესვათ. ღონისძიებას ადმინისტრაციული/აკადემიური პერსონალი და სტუდენტები ესწრებოდნენ.