საჯარო ლექცია ჯანმრთელობისა და მედიცინის აქტუალურ საკითხებზე

19 ივნისს, კავკასიის საერთაშორისო უნივერსიტეტში მედიცინის ფაკულტეტის ორგანიზებით საჯარო ლექცია გაიმართა, რომელიც ჯანმრთელობისა და მედიცინის აქტუალურ საკითხებს მიეძღვნა.

საჯარო ლექციის მომხსენებლები იყვნენ: ია გორგილაძე - ექიმი, პედიატრი, ფიზიოთერაპევტი, ატლასსპეციალისტი და ნუტრიციოლოგი; თამარ ხარაიშვილი - ოჯახის ექიმი, კლინიკა „კურაციოს“ წარმომადგენელი, საქართველოს რესპირატორული ასოციაციისა და საქართველოს კლინიცისტ ენდოკრინოლოგთა ასოციაციის წევრი.

ია გორგილაძემ ისაუბრა კისრის პირველი მალის - ატლასის მნიშვნელობაზე საყრდენ-მამოძრავებელი აპარატის ფორმირებასა და ხერხემლის პათოლოგიების განვითარებაში. მომხსენებელმა განსაკუთრებული ყურადღება გაამახვილა კისრის პირველი მალის დეფორმაციების კავშირზე ხერხემლისა და განსაკუთრებით ყბა-სახის მიდამოს პათოლოგიებთან, ასევე მკურნალობის უნიკალური შვეიცარიული მოდელის მნიშვნელობაზე ყბა-კბილთა სისტემის ანომალიების ორთოდონტიული მართვის პროცესში. განხილულ იქნა პაციენტებისა და სტომატოლოგებისთვის გასათვალისწინებელი საკითხები, მათ შორის საფეთქელ-ქვედა ყბის სახსრის დაზიანებასთან ასოცირებული პათოლოგიები და ნუტრიციოლოგიური მხარდაჭერის როლი მკურნალობის პროცესში.

თამარ ხარაიშვილმა ისაუბრა კრონის დაავადებაზე, პირის ღრუში მის გამოვლინებასა და თანამედროვე დიაგნოსტიკისა და მართვის მიდგომებზე. შეხვედრაზე ყურადღება გამახვილდა დაავადების კლინიკურ თავისებურებებსა და დროული დიაგნოსტირების მნიშვნელობაზე.
საჯარო ლექცია მედიცინის ფაკულტეტის ყველა მიმართულების სტუდენტებისა და პრაქტიკოსი ექიმებისთვის იყო განკუთვნილი.