მასტერკლასი თვითპრეზენტაციის მნიშვნელობაზე და მემორანდუმი კომპანია Match UP Consulting-თან

5 დეკემბერს კავკასიის საერთაშორისო უნივერსიტეტის სტუდენტებისთვის გაიმართა მასტერკლასი თემაზე: „ბრენდი, რომელიც შენშია: თვითპრეზენტაციის მნიშვნელობა გასაუბრებისას", რომელსაც უძღვებოდა ნატა კოტარია - Match UP Consulting-ის დამფუძნებელი, დირექტორი, HR და კარიერული კონსულტანტი.

„დღევანდელი შეხვედრა მიზნად ისახავდა სტუდენტების ინფორმირებას თვითპრეზენტაციის მნიშვნელობაზე გასაუბრებისას და საკუთარი თავის, როგორც ბრენდის წარმოჩენაზე. გასაუბრების დროს მთავარია ზომიერება, როგორც თავდაჯერებულობაში, ისე საკუთარი თავის წარმოჩენაში. მნიშვნელოვანია გვესმოდეს, რა „ტკივილები“ ან დისკომფორტი უბიძგებს დამსაქმებელს ვაკანსიის განსათავსებლად. ჩვენი მიზანია, რომ შევძლოთ მათთვის ემოციის დატოვება, შესაბამისად, ჩვენ ვიქნებით ის ადამიანები, ვინც შესაფერისია მათი დისკომფორტის აღმოსაფხვრელად.

მასტერკლასზე ჩავატარეთ სიმულაციური გასაუბრება სტუდენტების ჩართულობით, რაც ემსახურებოდა გასაუბრების ტექნიკების შესახებ ინფორმაციის მიწოდებას, ასევე იმის გარკვევას, თუ რისი მოსმენა სურს დამსაქმებელს, იმისთვის, რომ დარწმუნდეს პოზიციისა და ჩვენი როგორც კანდიდატის შესაბამისობაში,” - აღნიშნა ნატა კოტარიამ.

ღონისძიების ფარგლებში კავკასიის საერთაშორისო უნივერსიტეტსა და კომპანია “Match UP Consulting-ს“ შორის ურთიერთთანამშრომლობის მემორანდუმი გაფორმდა. დოკუმენტს ხელი CIU-ს ვიცე-რექტორმა თამარ ინასარიძემ  და კომპანია “Match UP Consulting-ის“ აღმასრულებელმა დირექტორმა ნატა კოტარიამ მოაწერეს.

შეხვედრას ესწრებოდნენ CIU-ს ხუთივე ფაკულტეტის სტუდენტები, რომლებსაც შესაძლებლობა მიეღოთ ამომწურავი პასუხები მათთვის საინტერესო საკითხებზე.

მასტერკლასი კავკასიის საერთაშორისო უნივერსიტეტის უწყვეტი განათლებისა და კარიერული განვითარების სამსახურის / ბიზნესისა და ტექნოლოგიების ფაკულტეტის ორგანიზებით გაიმართა.