კავკასიის საერთაშორისო უნივერსიტეტმა Real Madrid Foundation Basketball Camp-ს უმასპინძლა

10-14 სექტემბერს, თბილისში, რეგიონში პირველად, Real Madrid Foundation Basketball Camp გაიმართა. ხუთდღიან კემპს კავკასიის საერთაშორისო უნივერსიტეტმა ახალ, თანამედროვე სპორტულ კომპლექსში უმასპინძლა.

კემპში მონაწილეობა 80-მა ახალგაზრდა კალათბურთელმა მიიღო, რომელიც სხვადასხვა ასაკობრივ ჯგუფებად იყვნენ დაკომპლექტებული. ხუთი დღის განმავლობაში მონაწილეებმა Real Madrid Foundation-ის პროფესიონალ მწვრთნელებთან ერთად ივარჯიშეს და ფონდის სპეციალურად შემუშავებული სპორტულ-საგანმანათლებლო პროგრამით ისარგებლეს. კემპის ფარგლებში ბავშვებს გადაეცათ სპორტული ეკიპირება და სიმბოლური საჩუქრები.

ახალგაზრდა კალათბურთელებს შესაძლებლობა ჰქონდათ, მიეღოთ პროფესიონალი მწვრთნელებისგან პრაქტიკული გამოცდილება და მნიშვნელოვანი რეკომენდაციები, გაცნობოდნენ კალათბურთის ტექნიკურ და სპორტულ განვითარებასთან დაკავშირებულ მეთოდოლოგიას და გაეუმჯობესებინათ საკუთარი შესაძლებლობები.

ღონისძიების დახურვის საზეიმო ცერემონიაზე მონაწილეებს სიტყვით მიმართეს: პროექტის ორგანიზატორმა - VB Sports Management-ის წარმომადგენელმა, კავკასიის საერთაშორისო უნივერსიტეტის საკალათბურთო გუნდის მთავარმა მწვრთნელმა და CIU-ის საკალათბურთო აკადემიის დირექტორმა ბექა წივწივაძემ; საქართველოს სპორტის მინისტრის მოადგილემ ირაკლი დოლაბერიძემ; თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსმა ირაკლი გვილავამ, ესპანეთის საელჩოს საქმეთა დროებითმა რწმუნებულმა საქართველოში ხავიერ ბელმონტ როლდანმა (Xavier Bellmont Roldán); საქართველოს კალათბურთის ფედერაციის წარმომადგენელმა და სუპერლიგის პრეზიდენტმა კობა კობიაშვილმა, ასევე Real Madrid Foundation-ის მწვრთნელებმა - დევიდ გონსალესმა (David González) და მონიკა ფლომ (Mónica Flo).

პროექტის ორგანიზატორი იყო VB Sports Management, მთავარი მხარდამჭერი - თბილისის მერია, ხოლო პარტნიორები Sports Orient, hubs.ge, მინერალური წყალი „ბაკურიანი“, Moxy Tbilisi, ბენე ექსკლუზივი (Bene Exclusive) და Gulf იყვნენ.

დახურვის ცერემონიის ფარგლებში 80-ვე მონაწილეს ოფიციალური სერტიფიკატი გადაეცა.