CIU-ში სემინარი “Skills Incubator“ გაიმართა

კავკასიის საერთაშორისო უნივერსიტეტის ბიზნესისა და ტექნოლოგიების ფაკულტეტის „ბიზნეს ინკუბატორის“ პლატფორმაზე გაიმართა სემინარი - “Skills Incubator“, რომელიც თანამედროვე შრომის ბაზარზე არსებულ ტრანსფორმაციებსა და მომავლის პროფესიულ გამოწვევებს მიეძღვნა. 25 დეკემბრის შეხვედრის მთავარ მიზანს სტუდენტებისთვის იმ ცოდნის გაზიარება წარმოადგენდა, რომელიც ციფრული ევოლუციის პირობებში კარიერულ მდგრადობას უზრუნველყოფს.

სემინარზე დეტალურად განიხილეს, თუ როგორ ცვლის ციფრული ტრანსფორმაცია კარიერულ არჩევანსა და დასაქმების ტრადიციულ ფორმებს. ხაზი გაესვა იმ გარემოებას, რომ თანამედროვე თაობა აღარ შემოიფარგლება მხოლოდ სტანდარტული ვაკანსიების ძიებით; ნაცვლად ამისა, ახალგაზრდები სულ უფრო მეტად ორიენტირებულნი არიან საკუთარი პროფესიული გზის შექმნასა და სამეწარმეო ინიციატივებზე.

დისკუსიის ერთ-ერთი საკვანძო საკითხი ხელოვნური ინტელექტის (AI) როლს შეეხო. სპიკერმა ყურადღება გაამახვილა იმაზე, თუ როგორ უნდა მოხდეს ტექნოლოგიური პროგრესის ინტეგრირება ყოველდღიურ საქმიანობაში ისე, რომ AI-მ არა პროფესიონალის ჩანაცვლება, არამედ მისი პოტენციალის გაძლიერება და განვითარების ხელშეწყობა უზრუნველყოს.

სემინარს უძღვებოდა ია ნადირაშვილი - CIU-ს ბიზნეს ინკუბატორის ხელმძღვანელი, რითეილ ექსპერტი და „BeWise Georgia“-ს მმართველი პარტნიორი. მან საკუთარ გამოცდილებაზე დაყრდნობით ისაუბრა ბიზნესის განვითარების იმ სტრატეგიულ უნარებზე, რომლებიც აუცილებელია 21-ე საუკუნის პროფესიონალისთვის.

ღონისძიება კროსფაკულტეტური ჩართულობით განხორციელდა.