CIU-ის წარმომადგენლები ბრიუსელის მსოფლიო კონკურსზე (CMB)

კავკასიის საერთაშორისო უნივერსიტეტის მევენახეობა-მეღვინეობის ფაკულტეტის დოქტორანტები, გიორგი სამანიშვილი და საბა ქიტიაშვილი, მიწვეულები იყვნენ სომხეთის დედაქალაქ ერევანში გამართულ ღვინის ერთ-ერთ ყველაზე პრესტიჟულ საერთაშორისო ღონისძიებაზე - ბრიუსელის მსოფლიო კონკურსზე (Concours Mondial de Bruxelles, CMB), სადაც კომისიის წევრების სტატუსით მიიღეს მონაწილეობა.

ბრიუსელის მსოფლიო კონკურსი (CMB) ღვინის სფეროში ერთ-ერთი ყველაზე ავტორიტეტული საერთაშორისო პლატფორმაა, რომელიც 1994 წლიდან ტარდება და ყოველწლიურად მსოფლიოს სხვადასხვა ქვეყნიდან 15 000-ზე მეტ განაცხადს აერთიანებს. კონკურსზე წარმოდგენილ ნიმუშებს სფეროს პროფესიონალები „ბრმა დეგუსტაციის“ პრინციპით აფასებენ, რაც შეფასების პროცესის მაქსიმალურ ობიექტურობას უზრუნველყოფს.

აღსანიშნავია, რომ წელს ისტორიაში პირველად, CMB-ს სომხეთის დედაქალაქმა ერევანმა უმასპინძლა. 21 მაისს გაიხსნა წითელი და თეთრი ღვინოების, ასევე ცქრიალა ღვინოების სესიები, რომლებიც გამონაკლისის სახით ერთდროულად გაიმართა.

სამი დღის განმავლობაში, 56 ქვეყნის 320-ზე მეტმა დეგუსტატორმა მსოფლიოს 51 ქვეყნიდან წარმოდგენილი 6 700-ზე მეტი წითელი და თეთრი ღვინის, ასევე თითქმის 1 000 ცქრიალა ღვინის ნიმუში შეაფასა.

ამავდროულად, კონკურსის ფარგლებში გაიმართა No/Low (უალკოჰოლო და დაბალალკოჰოლიანი ღვინოების) სესიაც, სადაც 100-ზე მეტი ნიმუში იყო წარმოდგენილი. აღნიშნული მიმართულება მსოფლიო ღვინის ინდუსტრიაში ერთ-ერთ სწრაფად მზარდ ტენდენციად მიიჩნევა.

ბრიუსელის მსოფლიო კონკურსის (CMB) შედეგები 10 ივნისს გამოქვეყნდება ოფიციალურ ვებგვერდზე - concoursmondial.com.

CIU-ის დოქტორანტების მონაწილეობა მსგავსი მასშტაბისა და მნიშვნელობის საერთაშორისო კონკურსში კიდევ ერთხელ უსვამს ხაზს უნივერსიტეტის ჩართულობას საერთაშორისო პროფესიულ და აკადემიურ სივრცეში, ასევე მევენახეობისა და მეღვინეობის მიმართულებით მაღალი დონის სპეციალისტების მომზადების მნიშვნელობას.