„ქართული ღვინის გზა“ - პროექტი მოსწავლეებისთვის

კავკასიის საერთაშორისო უნივერსიტეტის საზოგადოებასთან ურთიერთობის სამსახურის  და მევენახეობა-მეღვინეობის ფაკულტეტის ორგანიზებით, დარგით დაინტერესებული მოსწავლეებისა და აბიტურიენტებისთვის საგანმანათლებლო-პროფესიული აქტივობა - „ქართული ღვინის გზა“ - გაიმართა.

აღნიშნული ინიციატივა მიზნად ისახავდა მომავალი სტუდენტების პროფესიულ ორიენტაციასა და ქართული მეღვინეობის დარგში არსებული აკადემიური და პრაქტიკული შესაძლებლობების პოპულარიზაციას. შემეცნებით ღონისძიებას უძღვებოდა ფაკულტეტის სასწავლო პროცესის მართვის კოორდინატორი და მეღვინეობა „ეთნო ოკამის“ გენერალური მენეჯერი, ლაშა ბოდაველი.
ვიზიტის ფარგლებში, პროექტის მონაწილეები დეტალურად გაეცნენ უნივერსიტეტის მფლობელობაში არსებულ სამეცნიერო-ტექნიკურ ბაზას. აბიტურიენტებს მიეწოდათ ინფორმაცია მევენახეობა-მეღვინეობის სფეროში დანერგილი ინოვაციების, კვლევითი პროცესებისა და დარგის განვითარების დინამიკის შესახებ.

პროექტის დასკვნით ნაწილში ყურადღება გამახვილდა მევენახეობა-მეღვინეობის ფაკულტეტზე არსებულ საგანმანათლებლო პროგრამებსა და იმ კარიერულ პერსპექტივებზე, რომლებსაც კავკასიის საერთაშორისო უნივერსიტეტი კვალიფიციური კადრების მომზადების კუთხით სთავაზობს დაინტერესებულ პირებს. მსგავსი ფორმატის აქტივობები მნიშვნელოვნად უწყობს ხელს ახალგაზრდებში დარგის მიმართ აკადემიური ინტერესის გაღვივებასა და გააზრებული პროფესიული არჩევანის გაკეთებას.