„მდგრადი განვითარების მიზნები განათლებაში“ - საინფორმაციო შეხვედრა CIU-ში

5 ოქტომბერს, კავკასიის საერთაშორისო უნივერსიტეტში ადმინისტრაციული თანამშრომლებისთვის გაიმართა შეხვედრა თემაზე: „მდგრადი განვითარების მიზნები განათლებაში“. ღონისძიება უნივერსიტეტის უწყვეტი განათლებისა და კარიერული განვითარების სამსახურისა და პერსონალის მართვის სამსახურის ერთობლივი ორგანიზებით ჩატარდა.

საინფორმაციო და შემეცნებით შეხვედრას უძღვებოდა მდგრადობის მეცნიერების აკადემიის დამფუძნებელი და აღმასრულებელი დირექტორი, სამართლის დოქტორი ირაკლი გივიაშვილი. მომხსენებელს დიპლომატიურ სამსახურში 24-წლიანი მოღვაწეობის გამოცდილება აქვს - სხვადასხვა წლებში იგი გახლდათ საქართველოს ელჩი ევროპის საბჭოში, ევროპის საბჭოს მინისტრთა კომიტეტის თავმჯდომარე და საგანგებო დავალებათა ელჩი.

ლექციაზე ირაკლი გივიაშვილმა დეტალურად მიმოიხილა განათლება მდგრადი განვითარებისათვის (ESD) კონცეფცია, მისი ისტორიული განვითარება და გლობალური მნიშვნელობა. შეხვედრაზე ხაზი გაესვა გაერო-ს, UNECE-ს, UNESCO-სა და ევროკავშირის საბჭოს მიერ წლების განმავლობაში მიღებულ საკვანძო დოკუმენტებსა და რეზოლუციებს.

სპიკერმა ყურადღება გაამახვილა იმაზე, რომ დღესდღეობით ახალგაზრდებსა და სტუდენტებში სულ უფრო იზრდება მოთხოვნა მდგრადობასთან დაკავშირებული ცოდნის მიღებაზე, რაც საგანმანათლებლო პროგრამების შესაბამის რეორიენტაციას მოითხოვს. მიუხედავად იმისა, რომ ESD აღიარებულია მდგრადი განვითარების მიზნების (SDGs) მიღწევის გადამწყვეტ საშუალებად, მისი პოტენციალი გლობალურად ჯერ კიდევ არ გამოიყენება სრულად. შესაბამისად, შეხვედრაზე აღინიშნა, რომ მომავალ წლებში აუცილებელია ქმედითი ნაბიჯების გადადგმა, რათა განათლებამ საკუთარი მთავარი როლი შეასრულოს უკეთესი და მდგრადი მომავლის მშენებლობაში.