„მარტივი AI ჩატბოტის აგება“ - ვორქშოპი

კავკასიის საერთაშორისო უნივერსიტეტმა საგანმანათლებლო კვირეულის - „AI ეკოსისტემა: ცოდნიდან ინოვაციამდე“ - დასკვნით შეხვედრას უმასპინძლა. ღონისძიება დაეთმო პრაქტიკულ ვორქშოპს თემაზე: „მარტივი AI ჩატბოტის აგება“, მომხსენებელი კი გახლდათ საქართველოს ტექნიკური უნივერსიტეტისა და კავკასიის საერთაშორისო უნივერსიტეტის ასოცირებული პროფესორი სოფიო ბარნოვი.

ვორქშოპზე მონაწილეები დეტალურად გაეცნენ, თუ რა არის ჩატბოტი და როგორ შეიძლება მისი პრაქტიკაში შექმნა. მომხსენებელმა აუდიტორიას განუმარტა, რომ ჩატბოტი არის პროგრამა, რომელიც მომხმარებლის კითხვებს პასუხობს - კითხულობს ტექსტს, ამოიცნობს მნიშვნელოვან სიტყვებს და აბრუნებს შესაბამის პასუხს.

ვინაიდან ვორქშოპი სრულიად დამწყებთათვის იყო გათვლილი და წინასწარ ცოდნას არ მოითხოვდა, მონაწილეებმა სესიის განმავლობაში ნაბიჯ-ნაბიჯ, თავად შექმნეს მარტივი ჩატბოტი, რომელსაც სხვადასხვა კითხვაზე პასუხის გაცემა შეუძლია. შეხვედრის ბოლოს ყველამ პრაქტიკულად დაინახა, როგორ მუშაობს ეს ტექნოლოგია და როგორია მისი შემდგომი განვითარების პერსპექტივები.

შეხვედრა ბიზნესისა და ტექნოლოგიების ფაკულტეტის დეკანმა, პროფესორმა ქეთევან ნანობაშვილმა გახსნა. მან სიტყვით გამოსვლისას შეაჯამა კვირეულის ფარგლებში განხორციელებული აქტივობები, ხაზი გაუსვა მსგავსი ინიციატივების მნიშვნელობას და მადლობა გადაუხადა თითოეულ მონაწილესა თუ ორგანიზატორს გაწეული შრომისთვის.

ბიზნესისა და ტექნოლოგიების ფაკულტეტი მომავალშიც აქტიურად გეგმავს ტექნოლოგიური და ინოვაციური პროექტების განხორციელებას, რაც სტუდენტებსა და დაინტერესებულ პირებს თანამედროვე უნარების ათვისებაში დაეხმარება.