მრგვალი მაგიდა თემაზე: „მეტაპოლიტოლოგიის და აკადემიური დიპლომატიის როლი მშვიდობიანი თანაარსებობისთვის“
16 მაისს კავკასიის საერთაშორისო უნივერსიტეტის გეოპოლიტიკური მოდელირების ლაბორატორიაში მშვიდობიანი თანაარსებობის საერთაშორისო დღისადმი (გაეროს რეზოლუცია 72/130) მიძღვნილი მრგვალი მაგიდა გაიმართა თემაზე: „მეტაპოლიტოლოგიის და აკადემიური დიპლომატიის როლი მშვიდობიანი თანაარსებობისთვის“.
შეხვედრა კავკასიის საერთაშორისო უნივერსიტეტის რექტორმა, კახაბერ კორძაიამ გახსნა, რომელმაც საკითხის აქტუალობის შესახებ ისაუბრა და მასში საუნივერსიტეტო საზოგადოების ჩართულობის მნიშვნელობაზე გაამახვილა ყურადღება.
2017 წლის 8 დეკემბერს გაეროს გენერალურმა ასამბლეამ თავისი რეზოლუციით (72/130) 16 მაისი მშვიდობიანი თანაცხოვრების საერთაშორისო დღედ გამოაცხადა და მიზნად დაისახა საერთაშორისო საზოგადოების ძალისხმევის მუდმივი მობილიზება ძალადობებისა და ომების საწინაღმდეგოდ.
უნივერსიტეტში გამართული შეხვედრაც სწორედ აღნიშნულ თარიღს ეხმაურებოდა, რომლის ძირითადი მიზანი იყო სახელმწიფო და საზოგადოებრივ დონეზე არსებული სამეცნიერო რესურსების ეფექტიანი გამოყენება, კოოპერაციის კულტურის ზრდა და თანამშრომლობის მუდმივმოქმედი ფორმატების შექმნა.
შეხვედრის მთავარი მომხსენებელი იყო პოლიტიკური ფსიქოლოგიის საერთაშორისო ორგანიზაციის წევრი, CIU-ს გეოპოლიტიკური მოდელირების ლაბორატორიის ხელმძღვანელი, მონოგრაფია „მეტაპოლიტოლოგიის არსენალი მშვიდობისათვის“ თანაავტორი, პროფესორი ალექსანდრე რუსეცკი, ხოლო მოდერატორი საქართველოს პოლიტიკის მეცნიერებათა და მორალის აკადემიის პრეზიდენტი, პროფესორი ვაჟა შუბითიძე.
მრგვალი მაგიდა დაეთმო ისეთი საკითხების განხილვას, როგორებიცაა: პოლიტიკის მეცნიერებათა და მორალის აკადემიის ინიციატივით მონოგრაფია „მეტაპოლიტოლოგიის არსენალი მშვიდობისათვის“ შედეგების პრეზენტაცია და პოლიტიკური მეცნიერების/ განათლების სტრატეგიაზე და მოქმედების პროგრამაზე ზრუნვა; აკადემიური საზოგადოების თანამშრომლობისათვის პირობების ხელშეწყობა - „კონსორციუმი მშვიდობიანი თანაარსებობისთვის“; პოლიტიკის მეცნიერებების მიმართულებით დარგობრივი საბჭოების შექმნის ინიციატივის გაძლიერება; სახელმწიფო და საერთაშორისო პოლიტიკის ახალი თაობის სამეცნიერო პროდუქციით უზრუნველყოფა; აკადემიურ საზოგადოებასა და მართვის სისტემებს შორის თანამშრომლობის განვითარება და მეტამართვის ეროვნული სისტემების გაძლიერება; გაეროსთან თანამშრომლობის მექანიზმები და შესაძლებლობები.
მრგვალი მაგიდის სამუშაო შეხვედრაში მონაწილეობას იღებდნენ სახელმწიფო და კერძო სტრუქტურების, საუნივერსიტეტო და აკადემიური წრეების წარმომადგენლები.