კსუ-ს ასოცირებული პროფესორი - ლალი მიქელაძე ტრენერების ტრენინგს დაესწრო

კავკასიის საერთაშორისო უნივერსიტეტის ტურიზმის საბაკალავრო - საგანმანათლებლო პროგრამის ხელმძღვანელი, ასოცირებული პროფესორი - ლალი მიქელაძე 22-26 ოქტომბერს, რომულო დელ ბიანკოს ფონდის ( ,,ცხოვრება ტურიზმის გზით" - იტალია ქ, ფლორენცია) მიწვევით, ტრენერების ტრენინგს დაესწრო.

კავკასიის საერთაშორისო უნივერსიტეტის, ტურიზმის საბაკალავრო - საგანმანათლებლო პროგრამის ხელმძღვანელს - ლალი მიქელაძეს ფონდის საპატიო აფილირებული წევრის სტატუსი მიენიჭა და ტრენინგის წარმატებით დასრულებისათვის ტრენერების ტრენერის სერტიფიკატი გადაეცა. საყურადღებოა ის ფაქტიც, რომ პროგრამის ხელმძღვანელის მიერ წინასწარი მოლაპარაკებების საფუძველზე, ვიზიტის ფარგლებში კსუ-სა და რომულო დელ ბიანკოს ფონდს შორის ურთიერთთანამშრომლობის მემორანდუმი გაფორმდა, რომელიც უნივერსიტეტის სტუდენტებისათვის ინტერნაციონალიზაციის პროცესის გაძლიერებისა და გამრავალფეროვნებისთვის მნიშნელოვანი წინგადადგმული ნაბიჯია. ღონისძიებაში ქართველ მონაწილეებთან ერთად, იტალიის, უკრაინის, რუსეთის, კამერუნის რესპუბლიკისა და პოლონეთის წარმომადგენლებიც ჩაერთნენ.

ტრენინგზე ყურადღება გამახვილდა კულტურული მემკვიდრეობის მნიშვნელობის როლზე ტურიზმის განვითარებისთვის. მონაწილეებმა განიხილეს ისეთი თემები, როგორიცაა: ტურიზმის დადებითი და უარყოფითი ზეგავლენის საკითხი კულტურულ მემკვიდრეობაში, განათლების საკითხებში პრაქტიკული კომპონენტის მოცულობის გაზრდა, ტურიზმში მონაწილე სუბიექტების ტურისტების და ადგილობრივი მოსახლეობის უსაფრთხოება. აღსანიშნავია, რომ რომულო დელ ბიანკოს ფონდი არის UNWTO-სა და ICOMOS - წევრი და მასში გაერთიანებულია 5 კონტინეტი, 5212 ქალაქი, 111 ქვეყანა და 500 ინსტიტუცია. ორგანიზაცია ხელს უწყობს ქვეყნებს შორის უნივერსალური ღირებულებების პატივისცემისა და ჰარმონიული თანამშრომლობის ხელშეწყობას გავრცელებასა და დანერგვას. ტურიზმს კი მოიაზრებს არა მარტო სამომხმარებლო მნიშვნელობით, არამედ განიხილავს ახალი ხედვით, როგორც სტრატეგიულ ასპექტს ტრადიციების, კულტურული მემკვიდრეობის შესაცნობად წარსულში, აწმყოსა და მომავალში.

აქვე გაცნობებთ, რომ 12 ნოემბერს 412 აუდიტორიაში 14:00 საათზე ტურიზმის პროგრამის ხელმძღვანელი - ლალი მიქელაძე სტუდენტებს შეხვდება და მათთან ჩატარებული ტრენინგისა და ფონდთან სამომავლო თანამშრომლობის შესახებ უფრო დეტალურად ისაუბრებს.