21 მაისს კავკასიის საერთაშორისო უნივერსიტეტის 600-მდე სტუდენტი „საქართველოს ეროვნულ ინტელექტ-ჩემპიონატ - ეტალონი 2016-ის“ ფინალზე დასასწრებად უნივერსიტეტიდან ერთად, საზეიმო მსვლელობით, გაემართა.
ტიტულისათვის - „2015-2016 სასწავლო წლის საქართველოს ეტალონი მოსწავლე“ - საქართველოს ყველა მუნიციპალიტეტისა და თბილისის (10 გამგეობის) 82 „ეტალონი-მოსწავლე“ იბრძოდა.
ფინალური თამაშის საორგანიზაციო ჯგუფი უნივერსიტეტის სტუდენტებით იყო დაკომპლექტებული. უცხოელი დიპლომატებისათვის, რომლებიც ღონისძიებას ესწრებოდნენ, კავკასიის საერთაშორისო უნივერსიტეტის სოციალურ მეცნიერებათა ფაკულტეტის საერთაშორისო ურთიერთობების სპეციალობის სტუდენტებმა თარჯიმნის ფუნქცია შეითავსეს.
ღონისძიებას, ასევე, საპატიო სტუმრებიც ესწრებოდნენ, მათ შორის იყვნენ: თბილისის მერი დავით ნარმანია და განათლებისა და მეცნიერების მინისტრი თამარ სანიკიძე. პროექტ „ეტალონის“ ავტორმა და წამყვანმა გოჩა ტყეშელაშვილმა მათ ქომაგის დიპლომი გადასცა.
ღონისძიება კონცერტით დაიწყო, სადაც უამრავ დასამახსოვრებელ მომენტთან ერთად ერთი განსაკუთრებული ნომერიც იყო - იაპონიის ელჩის ტოშიო კაიტანის მიერ ანსამბლ „ადილასთან“ ერთად შესრულებული სიმღერა - „თბილისო“.
ღონისძიების მეორე ნაწილი საკმაოდ ემოციური აღმოჩნდა - 82 მონაწილე, საპრიზო ფონდი 30 000 ლარი და სამი გამარჯვებული.
ცოდნასთან ერთად სისწრაფე - ეს იყო მთავარი უნარი, რაც წარმატების საწინდარი აღმოჩნდა. 75 ქულით (31.11 წამში) გამარჯვებული და 20 000 ლარის მფლობელი ბათუმის მუნიციპალიტეტის მოსწავლე ანრი ფაღავა გახდა.
გამარჯვებულს ფულადი პრიზი და დიპლომი პოლონეთის ელჩმა ანჟეი ჩიეშკოვსკიმ გადასცა.
მეორე ადგილი 70 ქულით (36.43 წამში) ქობულეთის მუნიციპალიტეტის მოსწავლემ ნია შაქარიშვილმა მოიპოვა. მას 6 000 ლარი გადაეცა.
70 ქულით (92.79 წამში) მესამე ადგილზე გასული ლენტეხის მუნიციპალიტეტის მოსწავლე გაგა გვიჭიანი კი 4 000 ლარით დაჯილდოვდა.
„ეტალონის“ ფინალურმა შოუ-კონკურსმა 2015-2016 სასწავლო წლის ციკლი დააგვირგვინა.
შეგახსენებთ, რომ კავკასიის საერთაშორისო უნივერსიტეტი პროექტ „ეტალონთან“ წლებია აქტიურად თანამშრომლობს.
„სახალხო იდეა „ეტალონი“ - ბედნიერება ყველას სჭირდება!“
ადრესატი
თქვენი სახელი
ელ-ფოსტა
თემა
შეტყობინება
