საადის ფონდის წარმომადგენლები კსუ-ში

სპარსული ენისა და კულტურის სწავლა უნივერსიტეტში - ეს იყო თემა, რომელზეც „საადის ფონდის“ წარმომადგენლებმა - საიდ დარბანდიმ და სორაია ხორამმა კავკასიის საერთაშორისო უნივერსიტეტის რექტორთან კახაბერ კორძაიასთან  შეხვედრისას ისაუბრეს.

მხარეებმა მათთვის სასურველი საკითხების განხორციელების პერსპექტივაზე იმსჯელეს.

რექტორმა სტუმრებს კსუ-ს ისტორია და მისია გააცნო და აღნიშნა თუ რა დიდი მნიშვნელობა აქვს უნივერსიტეტისთვის ირანთან თანამშრომლობას.

 „საადის ფონდის“ კურატორმა საერთაშორისო საკითხებში საიდ დარბანდიმ რექტორთან საუბრისას ყურადღება უნივერსიტეტში არსებულ ენების ცენტრსა და სასწავლო პროგრამაში არჩევით საგნად სპარსული ენის დამატებაზე გაამახვილა.

სტუმრებმა კავკასიის საერთაშორისო უნივერსიტეტის დიპლომის ირანში აღიარების საკითხზე, სასწავლო სტიპენდიებსა და ირანში კსუ-ს საუკეთესო სტუდენტის სპარსული ენის ერთთვიან პროგრამაში ჩართვაზე ისაუბრეს, ასევე, უნივერსიტეტს საქართველო-ირანის პოლიტიკური, ეკონომიკური და კულტურული ურთიერთობებისადმი მიძღვნილ მეორე საერთაშორისო კონფერენციაზე, რომელიც 7 ივნისსა ჩანიშნული, მხარდაჭერა გამოუცხადეს.

ირანის ისლამური რესპუბლიკის კულტურის ატაშე მოჯთაბა ქამრანფარდიმ, რომელიც აღნიშნულ შეხვედრას ესწრებოდა, რექტორსა და ირანისტ მაია კაპანაძეს, განხორციელებული და დაგეგმილი ღონისძიებისათვის მადლობა გადაუხადა.

შეხვედრის ბოლოს სტუმრებმა კავკასიის საერთაშორისო უნივერსიტეტში არსებული ირანის კაბინეტი დაათვალიერეს და ხელმძღვანელობას ბიბლიოთეკის სხვადასხვა მასალით  გამდიდრებას შეპირდნენ.