29 ნოემბერს კავკასიის საერთაშორისო უნივერსიტეტში, CIU სამართლის ფაკულტეტის ორგანიზებით, სამეცნიერო დისკუსია: „სოციალური სამართლის არსი და გამოწვევები თანამედროვე საზოგადოებაში“ გაიმართა.
ადამიანის უფლებები ის ფუნდამენტია, რომელიც ნებისმიერ საზოგადოებაში დემოკრატიის და ინდივიდის უსაფრთხოების წინაპირობას წარმოადგენს. გამოწვევები, რომელიც ჩვენი ცხოვრების მრავალ სფეროს ეხება არის იმ გარდაქმნების შედეგი, რომელიც დღესდღეობით მიმდინარეობს ჩვენს საზოგადოებაში. სოციალური რისკები, როგორიც არის შეზღუდული შესაძლებლობა, მარჩენალის დაკარგვა, დროებითი ან ხანგრძლივი შორმისუუნარობა და სხვა, შეიძლება შეეხოს ყველას. სოციალური რისკების წარმოშობის შემთხვევაში შესაბამისი უზრუნველყოფის მიღების სამართლებრივ საფუძველს ქმნის სოციალური სამართალი, რომელიც ასევე ცნობილია როგორც სოციალური დაცვის სამართალი ან სოციალური უზრუნველყოფის სამართალი. იგი განიხილება როგორც სამართლის დისციპლინა.
სამეცნიერო დისკუსია მიზნად ისახავდა სოციალური სამართლის არსის, წყაროების და შინაარსის წარმოჩენას. სპიკერებმა, ქართული, გერმანული და უნგრული სოციალური სისტემის მაგალითზე განიხილეს სოციალური დაცვის საკითხები, ეკონომიკური და სოციალური ცვლილებებით განპირობებული გამოწვევები.
ღონისძიებაზე მონაწილეებსა და დამსწრეებს მისასალმებელი სიტყვით მიმართეს კავკასიის საერთაშორისო უნივერსიტეტის რექტორმა, დოქტორმა, პროფესორმა, კახაბერ კორძაიამ; საქართველოს საკონსტიტუციო სასამართლოს თავმჯდომარემ, სამართლის დოქტორმა, პროფესორმა, მერაბ ტურავამ და კავკასიის საერთაშორისო უნივერსიტეტის სამართლის ფაკულტეტის დეკანმა, სამართლის დოქტორმა, პროფესორმა გიორგი ხატიძემ.
დისკუსიაში მონაწილეობა მიიღეს და მოხსენებები გააკეთეს როგორც ქართველმა ისე, გერმანელმა და უნგრელმა პროფესორებმა, მკვლევარებმა და აკადემიური წრეების წარმომადგენლებმა: ებერჰარდ აიხენჰოფერმა (სამართლის დოქტორი, პროფესორი, საპატიო დოქტორი, ფრიდრიხ შილერის სახელობის იენის უნივერსიტეტი); იოსეფ ჰაიდუმ (სამართლის დოქტორი, პროფესორი, დეპარტამენტის ხელმძღვანელი, სეგედის უნივერსიტეტი, სამართლის ფაკულტეტი, უნგრეთი); ნორა იაკაბმა (სამართლის დოქტორი, პროფესორი, მიშკოლცის უნივერსიტეტის იურიდიული ფაკულტეტი, უნგრეთი; კავკასიის საერთაშორისო უნივერსიტეტის სამართლის ფაკულტეტის ასოცირებული პროფესორი); მარიამ ცისკაძემ (სამართლის დოქტორი, პროფესორი, საქართველოს უნივერსიტეტი, თბილისის სააპელაციო სასამართლოს მოსამართლე); პროფესორმა ქეთევან მჭედლიშვილი - ჰედრიხმა (სამართლის დოქტორი, საქართველოს უნივერსიტეტის სამართლის ფაკულტეტის ასოცირებული პროფესორი, ივანე ჯავახიშვილის სახელობის თბილისის სახელმწიფო უნივერსიტეტის მოწვეული ლექტორი); ნინო მჭედლიშვილმა (სამართლის დოქტორი, მოწვეული ლექტორი, ივანე ჯავახიშვილის სახელობის თბილისის სახელმწიფო უნივერსიტეტი, საქართველოს ეროვნული უნივერსიტეტი); ანა ფირცხალაშვილმა (სამართლის დოქტორი, პროფესორი, საქართველოს ეროვნული უნივერსიტეტის ვიცე-რექტორი); ბექა ქანთარიამ (სამართლის დოქტორი, კავკასიის საერთაშორისო უნივერსიტეტის სამართლის ფაკულტეტის ასოცირებული პროფესორი).
მოხსენებები გაკეთდა ისეთ თემებზე, როგორიცაა: სოციალური სამართლის ცნება და განზომილებები; უფლება სოციალურ უზრუნველყოფაზე - სოციალური უფლება როგორც ადამიანის უფლება (ევროპის საბჭოს ევროპული სოციალური ქარტიის ცნებისა და დებულებების განსაკუთრებული გათვალისწინებით); უფლება სოციალურ უზრუნველყოფაზე - უნგრული მიდგომა; ზოგიერთი სოციალური კატეგორიის დავის სასამართლოში განხილვის თავისებურებანი; სოციალური სამართლის სისხლისსამართლებრივი ასპექტები; სოციალური დაცვის სისტემა საქართველოში - მიმოხილვა; საქართველოს საკონსტიტუციო სასამართლოს პრაქტიკა სოციალურ უფლებებთან დაკავშირებით; სოციალური საკითხები პოლიტიკური პარტიების პროგრამებში.
სამეცნიერო დისკუსიას ასევე ესწრებოდნენ კავკასიის საერთაშორისო უნივერსიტეტის სამართლის ფაკულტეტის სტუდენტები და სამეცნირო-აკადემიური წნრეების წარმომადგენლები.
ადრესატი
თქვენი სახელი
ელ-ფოსტა
თემა
შეტყობინება