ტელეკომპანია რუსთავი 2-ის გენერალურ
დირექტორს ბატონ პაატა სალიას
ბატონო პაატა,
მოგახსენებთ, რომ 2018 წლის 22 დეკემბერს, ტელეკომპანია „რუსთავი 2“ - მა მოამზადა სიუჟეტი კავკასიის საერთაშორისო უნივერსიტეტზე, რომლითაც ანონიმური განმცხადებლის ინფორმაციაზე დაყრდნობითა და ცრუ ბრალდებით, სერიოზული დარტყმა მიადგა უნივერსიტეტის რეპუტაციას. სიუჟეტში განხილული იყო ორი საკითხი: ჩვენ მიერ ერთ-ერთ სტუდენტზე, ვითომ ყალბი დიპლომის გაცემის ფაქტი და თეა წულუკიანის, როგორც ჩვენი დოქტორანტის სწავლა და მიღებული შეფასებები.
გვსურს, მოკლედ განგიმარტოთ თქვენი ტელევიზიის ჟურნალისტის ეკო მაღრაძისა და „შაბათის კურიერის“ ჯგუფის მიზანმიმართული ცრუ ბრალდებების დეტალები:
ჩვენს უნივერსიტეტში ნამდვილად სწავლობდა აზერბაიჯანის მოქალაქე მირჯალალ ზეინალოვი, რომელიც ჩაირიცხა სამაგისტრო პროგრამაზე 2014 წელს და სწავლა დაამთავრა 2017 წელს. დიპლომის გაცემამდე მან წარმოადგინა აზერბაიჯანის რესპუბლიკის იუსტიციის სამინისტროს მიერ გაცემული მოწმობა გვარის ცვლილების თაობაზე და მოგვმართა განცხადებით, დიპლომი გაცემულიყო ახალ, შეცვლილ გვარზე, რაც დავაკმაყოფილეთ. ეს აისახა განათლებისა და მეცნიერების სამინისტროს სტუდენტთა რეესტრში. ამ ინფორმაციის გადამოწმება ადვილად იყო შესაძლებელი თქვენი ტელევიზიის ჟურნალისტების მიერ, თუმცა, მათ ეს არ გააკეთეს. აღარ ვსაუბრობთ მათი მხრიდან უნივერსიტეტში შემოჭრის ფაქტზე, წინასწარი შეთანხმების გარეშე, ძალადობაზე, აგრესიულ ტონსა და სკანდალურ განცხადებებზე.
რაც შეეხება იუსტიციის მინისტრის, თეა წულუკიანის საკითხს, რომელიც ჩვენი უნივერსიტეტის სამართლის სადოქტორო პროგრამის დოქტორანტია, მისი ჩარიცხვა მოხდა 2017 წლის სექტემბერში და სამეცნიერო ხელმძღვანელად განესაზღვრა პროფესორი მინდია უგრეხელიძე. დოქტორანტის მიერ შესრულებული როგორც სასწავლო, ასევე კვლევით კომპონენტებზე არსებობს ყველა საჭირო დოკუმენტური მასალა. მისი პროსპექტუსის დაცვა წარმატებით განხორციელდა ფართო აუდიტორიის თანდასწრებით.
ჟურნალისტის ხელთ არსებული მონაცემებითაც კი (კორესპონდენტს თან ჰქონდა დოქტორანტის სასწავლო ბარათი) ცხადი იყო, რომ იმ პირობებში, როცა დოქტორანტი ვერ/არ დადიოდა სასწავლო კომპონენტებით გათვალისწინებულ შეხვედრებზე, მას არ აქვს შეფასებები. შესაბამისად, წინასწარვე იყო განსაზღვრული მინისტრის დისკრედიტირება, რომელიც თავისთავად ეჭვქვეშ აყენებდა ჩვენს რეპუტაციასაც.
როგორც ზემოთ აღვნიშნეთ, სიუჟეტმა მნიშვნელოვანი ზიანი მიაყენა უნივერსიტეტის იმიჯს. გვქონდა მსჯელობა, რომელი გზა უფრო პრაგმატული და ცივილიზებული იქნებოდა დისკრედიტებული სახელის რეაბილიტაციისთვის. გადავწყვიტეთ, რომ არ ავყოლოდით პოლიტიკურ დღის წესრიგს და სამართლებრივი გზით დაგვეწყო საფუძვლიანი არგუმენტების შექმნა. ამ მიზნით 24 დეკემბერს განცხადებით მივმართეთ საქართველოს განათლების, მეცნიერების, კულტურისა და სპორტის მინისტრს და ასევე, სსიპ განათლების ხარისხის განვითარების ეროვნული ცენტრის დირექტორს, რათა შეესწავლათ საკითხი და მოეხდინათ შესაბამისი რეაგირება. განათლების სამინისტრომ, თავის მხრივ, წერილი გადააგზავნა გენერალურ პროკურატურაში, ვინაიდან საკითხი შეიცავდა ინფორმაციას სისხლის სამართლის დანაშაულის შესაძლო ფაქტის შესახებ.
სამინისტროს რეაგირების ფარგლებში შეიქმნა სსიპ განათლების ხარისხის განვითარების ეროვნული ცენტრის ავტორიზაციის მონიტორინგის ჯგუფი, ვიზიტი განხორციელდა უნივერსიტეტში და მოხდა საკითხის შესწავლა. მონიტორინგის კომისიამ მოამზადა დასკვნა, რომლითაც არ დასტურდება არც ერთი დარღვევა, რაც მითითებულია თქვენი ტელეკომპანიის მიერ მომზადებულ სიეჟეტში. საბოლოოდ საკითხი გავიდა განათლების ხარისხის განვითარების ეროვნული ცენტრის ავტორიზაციის საბჭოზე, სადაც ასევე გამოკვლეული იქნა გარემოებები და შეწყდა წარმოება უნივერსიტეტის ავტორიზაციის გაუქმების შესახებ.
პარალელურად გამოძიებას ახორციელდებდა პროკურატურა, რომლის მოთხოვნითაც უნივერსიტეტიდან გათხოვეს მირჯალალ ქანგარლის ჩარიცხვის მომენტიდან დაწყებული, სწავლის პერიოდში და სწავლის დასრულების შემდეგ არსებული ყველა დოკუმენტი. ამასთან გადამოწმდა კურსდამთავრებულის საზღვრის კვეთის მონაცემები, გამოიკითხნენ მისი ლექტორები და საბოლოოდ დადგინდა, რომ არ არსებობს სისხლის სამართლის კოდექსით გათვალისწინებული ქმედება და შეწყდა გამოძიება.
შვიდი თვის განმავლობაში უნივერსიტეტი მშვიდად, ზედმეტი განცხადებების გარეშე ცდილობდა საკითხი შესწავლილიყო ყოველმხრივ და ყველაზე მაღალი სტანდარტით. სისხლის სამართლის საქმის შეწყვეტის შესახებ 2019 წლის, 13 ივლისის წერილი იყო ის საბოლოო დოკუმენტი, რომელიც უფლებას გვაძლევს კანონიერი გზით მოვითხოვოთ შელახული სახელისა და ღირსების რეაბილიტაცია. აღნიშნულიდან გამომდინარე, ტელეკომპანია „რუსთავი 2“-სგან მოვითხოვთ იმავე გადაცემაში ან უბრალოდ საჯარო განცხადების გზით მოახდინონ 2018 წლის 22 დეკემბრის სიუჟეტში კავკასიის საერთაშორისო უნივერსიტეტისადმი გაჟღერებული ბრალდებებისა და ცილისწამების უარყოფა (განცხადებას თან ერთვის დანართი 1 დადგენილება სისხლის სამართლის საქმეზე გამოძიების შეწყვეტის შესახებ - ხუთ გვერდად და დანართი 2 უმაღლესი საგანმანათლებლო დაწესებულების ავტორიზაციის საბჭოს გადაწყვეტილება და ავტორიზაციის ექსპერტთა ჯგუფის დასკვნა - თორმეტ გვერდად).
იმედს ვიტოვებთ, რომ „რუსთავი 2“- ის ახალი ხელმძღვანელობის პირობებში აღარ განხორციელდება მსგავსი ფაქტები და არ აღმოჩნდება მაღალი რეპუტაციის მქონე კავკასიის საერთაშორისო უნივერსიტეტი ცრუ ბრალდებისა და ბინძური პოლიტიკური თამაშების მსხვერპლი.
პატივისცემით,
კავკასიისს საერთაშორისო უნივერსიტეტის
რექტორი კახაბერ კორძაია
დადგენილება სისხლის სამართლის საქმეზე გამოძიების შეწყვეტის შესახებ
ადრესატი
თქვენი სახელი
ელ-ფოსტა
თემა
შეტყობინება
