CIU-ს მორგენთაუს კლუბის (დებატკლუბი) ორგანიზებით კარლ პოპერის ფორმატის დებატები მიმდინარეობს

კავკასიის საერთაშორისო უნივერსიტეტის „მორგენთაუს კლუბის“ (დებატკლუბი) ორგანიზებით კარლ პოპერის ფორმატის დებატები მიმდინარეობს.

11 აპრილს პირველ თამაშში ერთმანეთს გუნდები - „ნიკე“ (დავით ირემაძე, მათე ბედენაშვილი, ანანო მიქავა) და „სიზიფეს მითი“ (გიორგი ლომუაშვილი, ნინი აფციაური, გიორგი სახვაძე) - დაუპირისპირდნენ, სადებატო რეზოლუციას კი წარმოადგენდა თემა - „ბირთვული ენერგიის უარყოფა - მშვიდობიანი მსოფლიოს გარანტი“.

გუნდების წარმოდგენილ რეზოლუციებსა და ჯვარედინ დაკითხვებს აფასებდა მოწვეული ჟიური შემდეგი შემადგენლობით: CIU-ს რექტორის მრჩეველი, გიორგი ფარეშიშვილი; CIU-ს საერთაშორისო ურთიერთობების საბაკალავრო პროგრამის ხელმძღვანელი, ასოცირებული პროფესორი, ალიკა გუჩუა; CIU-ს სპორტის, კულტურისა და ახალგაზრდულ საქმეთა დეპარტამენტის წარმომადგენელი, კლუბების გაერთიანების პრეზიდენტი, ბაკურ ხუბულავა.

ჟიურის შეფასებით გამარჯვებული გახდა უარმყოფელი გუნდი „სიზიფეს მითი“, თამაშის საუკეთესო მოდებატის ტიტული კი „ნიკეს“ კაპიტან დავით ირემაძეს ერგო.

თამაშს სპიკერობას უწევდა დებატკლუბის ხელმძღვანელი, ბესიკ თავართქილაძე.

ცნობისთვის, დებატების საგაზაფხულო ჩემპიონატი მარტში დაიწყო და მაისში დასრულდება, გამარჯვებული გუნდები კი შემდეგ ეტაპზე განაგრძნობენ ბრძოლას ჩემპიონობისთვის.