მასტერკლასი სკოლის დირექტორებისთვის

30 მარტს SS International EDU for Georgia-სა და კავკასიის საერთაშორისო უნივერსიტეტის თანამშრომლობით სკოლის დირექტორებისთვის გაიმართა მასტერკლასი თემაზე: „ლიდერები, რომლებიც ზრდიან მომავლის ლიდერებს“.

მასტერკლასს უძღვებოდა ფსიქოლოგი, ევროპული აკრედიტაციის (WAPP & IFP) ფსიქოთერაპევტი და პოზიტიური ფსიქოთერაპიის საერთაშორისო წარმომადგენლობის ხელმძღვანელი საქართველოში ლალი ბადრიძე.

ღონისძიების მიზანი იყო საგანმანათლებლო დაწესებულებების ხელმძღვანელების პროფესიული კომპეტენციების გაძლიერება, თანამედროვე საგანმანათლებლო გარემოს გამოწვევების გაცნობა და განათლების სფეროში მიმდინარე გლობალურ და ლოკალურ ცვლილებებზე მუშაობა.

მასტერკლასზე დამსწრე აუდიტორიას სიტყვით მიმართეს: SS International EDU for Georgia-ს დირექტორმა, სოფიკო ქვარცხავამ, რომელმაც გლობალური განათლების მნიშვნელობაზე, გამოწვევებსა და შესაძლებლობებზე ისაუბრა, ასევე მიმდინარე და სამომავლო პროექტების შესახებ ინფორმაცია გააზიარა; კავკასიის საერთაშორისო უნივერსიტეტის რექტორის მრჩეველმა, ნიკო ნიკოლაძის საზოგადოების თავმჯდომარემ, გიორგი ფარეშიშვილმა, რომელმაც ყურადღება გაამახვილა ლიდერობის უწყვეტ განვითარებაზე სკოლიდან უნივერსიტეტამდე.

ღონისძიების მეორე ნაწილი დაეთმო ინტერაქტიულ ვორქშოპს, სადაც მონაწილეებმა მომავლის სკოლის კონცეფციებზე იმუშავეს. ეს ინიციატივა მიზნად ისახავდა სკოლის გაძლიერებასა და განათლების ხარისხის გაუმჯობესებას.

ღონისძიების მხარდამჭერი გახლდათ გამომცემლობა „დიოგენე“, რომლის საგანმანათლებლო მიმართულების ხელმძღვანელმა, მაგდა ბარამიძემ, სკოლის დირექტორებს საჩუქრად წიგნები გადასცა.

ღონისძიების ფარგლებში ასევე გაიმართა ახალგაზრდა მხატვრის, ანა ბოტკოველის ნამუშევრების გამოფენა, ხოლო მუსიკალური გაფორმება მევიოლინე ცისანა ნიკოლეიშვილმა უზრუნველყო.

ორგანიზატორების განცხადებით, ეს მხოლოდ დასაწყისია და მომავალში კიდევ უფრო მასშტაბური პროექტებით დაბრუნდებიან, რათა განათლების სფეროში ინოვაციური მიდგომებისა და ლიდერული სტრატეგიების გაძლიერებას ხელი შეუწყონ.