27 ნოემბერს ღვინის ეროვნული სააგენტოს მოწვევით, მევენახეობა-მეღვინეობის ფაკულტეტის დეკანი - ოლან გოცირიძე, პროფესორ-მასწავლებლები და ფაკულტეტის მაგისტრანტები ფილმის „საქართველო-ღვინის სამშობლო" საპრემიერო ჩვენებას დაესწრნენ. გარემოს დაცვისა და სოფლის მეურნეობის სამინისტროს მიერ გავრცელებულ ინფორმაციაზე დაყრდნობით, ფილმი იმ საერთაშორისო სამეცნიერო კვლევას ეძღვნება, რომელმაც ისტორიული აღმოჩენა გააკეთა და მეცნიერულად დაასაბუთა, რომ სწორედ საქართველოა ღვინის სამშობლო და 8000 წლის წინ ჩვენს ქვეყანაში დაიწყო ღვინის პირველი წარმოება.
სამეცნიერო-დოკუმენტური ფილმი გადაღებულია გარემოს დაცვისა და სოფლის მეურნეობის სამინისტროს სსიპ ღვინის ეროვნული სააგენტოს მხარდაჭერით. 40-წუთიანი ფილმის რეჟისორია ალექსანდრე გაბუნია. გადაღებები, საქართველოსთან ერთად, აშშ-ში, იტალიასა და საფრანგეთში მიმდინარეობდა. პროექტის სამეცნიერო ხელმძღვანელია მეცნიერებათა ეროვნული აკადემიის წევრ-კორესპონდენტი დავით ლორთქიფანიძე, ხოლო კოორდინატორი - ღვინის ეროვნული სააგენტოს მეცნიერი, საქართველოს მევენახეობის დარგის პროფესორი, სოფლის მეურნეობის მეცნიერებათა აკადემიური დოქტორი დავით მაღრაძე.
აღსანიშნავია, რომ ფილმი არის საფესტივალო და 2019 წლიდან ის წარდგენილი იქნება სხვადასხვა ქვეყნის ფესტივალზე. პრემიერას საქართველოს პრემიერ-მინისტრი მამუკა ბახტაძე, გარემოს დაცვისა და სოფლის მეურნეობის მინისტრი ლევან დავითაშვილი, მთავრობისა და პარლამენტის წევრები, სამეცნიერო და კულტურის სფეროს წარმომადგენლები ესწრებოდნენ.
ადრესატი
თქვენი სახელი
ელ-ფოსტა
თემა
შეტყობინება
