25 ივნისს კავკასიის საერთაშორისო უნივერსიტეტის რეკრუტირების ჯგუფის მიერ ორგანიზებული ინტელექტუალური თამაშის „ონლაინ-კვადრო“ საპრიზო ადგილზე გასული გუნდები დაჯილდოვდნენ. ღონისძიება კსუ-ს რექტორმა, კახაბერ კორძაიამ გახსნა, რომელმაც ყუდადღება პროექტის მნიშვნელობაზე გაამახვილა და მოსწავლეებს პედაგოგებთან ერთად მადლობა გადაუხადა თამაშში ჩართვისთვის. აუდიტორიის წინაშე სიტყვით წარდგა კსუ-ს სამეცნიერო კვლევების დეპარტამენტის უფროსის მოადგილე, უნივერსიტეტის რეკრუტირების ჯგუფის ხელმძღვანელი, ნინო მინდიაშვილი, რომელმაც გუნდებს პროექტში ნაჩვენები შედეგები მიულოცა და მოსწავლეებს სერტიფიკატები, პედაგოგებსა და დირექტორებს კი მადლობის სიგელები გადასცა. ასევე, გუნდები უნივერსიტეტის ბრენდირებული საჩუქრებითა და წიგნებით დაჯილდოვდნენ.
ინტელექტუალურ თამაშში „ონლაინ-კვადრო“ 2021 წლის ზამთრისა და გაზაფხულის სეზონები ჩატარდა.
თითოეულ სეზონზე ჩემპიონატში მონაწილეობას თბილისისა და რეგიონების 16 სკოლის ოთხი მოსწავლისგან დაკომპლექტებული გუნდი იღებდა, მარათონული ტურნირის საპრიზო ადგილები კი შემდეგნაირად გადანაწილდა:
I ადგილი: ქ. ზუგდიდის მე-9 საჯარო სკოლა;
II ადგილი: საჩხერის მუნიციპალიტეტის სოფ. არგვეთის საჯარო სკოლა;
III ადგილი: ზუგდიდის მუნიციპალიტეტის სოფ. ყულიშკარის საჯარო სკოლა.
I ადგილი: გარდაბნის მუნიციპალიტეტის სოფ. სართიჭალის მე-2 საჯარო სკოლა;
II ადგილი: ქ. თბილისის 219-ე საჯარო სკოლა;
III ადგილი: ქ. რუსთავის მე-17 საჯარო სკოლა.
დაჯილდოების ღონისძიებას მოდერატორობას რეკრუტირების ჯგუფის წარმომადგენელი ბაკურ ხუბულავა უწევდა, ჯგუფის წევრებმა გიორგი მორგოშიამ და თათული კოდუამ კი მოსწავლეებს კავკასიის საერთაშორისო უნივერსიტეტის ფაკულტეტები გააცნეს და ადმინისტრაციის წარმომადგენლებთან ერთად, საუნივერსიტეტო ტურიც მოუწყვეს.
მოსწავლეებმა უნივერსიტეტის მულტიმედია ცენტრი, იმიტირებული სასამართლო პროცესების დარბაზი, იურიდიული კლინიკა, თანამედროვე სამედიცინო ლაბორატორიები, მევენახეობა-მეღვინეობის უნიკალური სასწავლო ბაზა და ბიბლიოთეკა დაათვალიერეს.
