კავკასიის საერთაშორისო უნივერსიტეტი და საქართველოს ენოტურიზმის ასოციაცია ღვინის ტურიზმის მსოფლიო ორგანიზაციას შეუერთდნენ

კავკასიის საერთაშორისო უნივერსიტეტი და საქართველოს ენოტურიზმის ასოციაცია (GETA) ღვინის ტურიზმის მსოფლიო ორგანიზაციას (GWTO) შეუერთდნენ.

აგვისტოს თვეში კავკასიის საერთაშორისო უნივერსიტეტის რექტორმა, კახაბერ კორძაიამ და საქართველოს ენოტურიზმის ასოციაციის ერთ-ერთმა დამფუძნებელმა და მმართველი ბორდის წევრმა, ქეთევან გორგილაძემ დისტანციური შეხვედრა გამართეს GTWO-ს პრეზიდენტსა და გენერალურ მდივან ხოსე ანტონიო ვიდალთან, სადაც მხარეებს შორის სამომავლო აქტიური თანამშრომლობის მიმართულებები განისაზღვრა.

როგორც ხოსე ანტონიო ვიდალი აცხადებს, ორგანიზაცია მოუთმენლად ელის კსუ-ს ჩართულობას GWTO აკადემიის საქმიანობაში საგანმანათლებლო მიმართულებით, რომელიც ხელს შეუწყობს საქართველოს პოზიციონირებას, როგორც ღვინის ტურიზმის ერთ-ერთ გამორჩეულ დანიშნულების ადგილს მსოფლიოს მასშტაბით.

„GWTO-სთან ერთობლივი მუშაობით შევძლებთ საქართველოში ღვინის ტურიზმის განვითარების ხელშეწყობას, საოჯახო მარნებისა და მათი პროდუქციის წარმატებაში აქტიური წვლილის შეტანას, საგანმანათლებლო ღონისძიებების უწყვეტობას, მსხვილი ბიზნესის ახალ შესაძლებლობებზე გაყვანას და რაც მთავარია, საქართველოს სახელის, როგორც ღვინის ტურიზმისთვის ერთ-ერთი საუკეთესო დანიშნულების ადგილის გატანას საერთაშორისო ასპარეზზე“ - აცხადებს საქართველოს ენოტურიზმის ასოციაციის ერთ-ერთი დამფუძნებელი და მმართველი ბორდის წევრი, ქეთევან გორგილაძე.

ასევე აღსანიშნავია, რომ უახლოეს პერიოდში განიხილება კავკასიის საერთაშორისო უნივერსიტეტისა და საქართველოს ენოტურიზმის ასოციაციის აქტიური თანამშრომლობა კატალონიის ღვინის ტურიზმის სკოლასთან.