დისკუსია საქართველოს საგარეო პოლიტიკის აქტუალურ საკითხებზე

27 დეკემბერს კავკასიის საერთაშორისო უნივერსიტეტის საერთაშორისო ურთიერთობების მიმართულების სტუდენტებმა პროფესორებთან ერთად საქართველოს საგარეო პოლიტიკასთან დაკავშირებული წლის მთავარი პოლიტიკური მოვლენები შეაჯამეს.

დისკუსიის ფარგლებში განსაკუთრებული ყურადღება გამახვილდა საქართველოსთვის ევროკავშირის კანდიდატი ქვეყნის სტატუსის მინიჭებასა და ამ მიმართულებით განხორციელებულ თუ დაგეგმილ რეფორმებზე. შეხვედრაზე ისაუბრეს საქართველოს ოკუპირებულ ტერიტორიებსა და ხალხთა შორის ნდობის აღდგენის საკითხზე. დისკუსიაზე ასევე განიხილეს აქტუალური რეგიონული კონფლიქტების გეოპოლიტიკური კონტექსტი და საქართველოს წინაშე მდგარი გამოწვევები.

დისკუსიას კავკასიის საერთაშორისო უნივერსიტეტის საერთაშორისო ურთიერთობების საბაკალავრო პროგრამის ხელმძღვანელი, ალიკა გუჩუა უძღვებოდა. შეხვედრაში აქტიური მონაწილეობა მიიღეს კავკასიის საერთაშორისო უნივერსიტეტის რექტორის მრჩეველმა, უნივერსიტეტის ნატოსა და ევროკავშირის კვლევითი ცენტრის ხელმძღვანელმა, გიორგი ფარეშიშვილმა და საერთაშორისო ურთიერთობებისა და საერთაშორისო უსაფრთხოების სამაგისტრო პროგრამის ხელმძღვანელმა, ვახტანგ მაისაიამ.