თანამშრომლობა „საერთაშორისო განათლების ცენტრსა“ და კავკასიის საერთაშორისო უნივერსიტეტს შორის

კავკასიის საერთაშორისო უნივერსიტეტი უცხოელ სტუდენტთა რეკრუტირების საკითხებში მემორანდუმის საფუძველზე „საერთაშორისო განათლების ცენტრთან“ (IEC - International Educational Center) თანამშრომლობს. აღსანიშნავია, რომ მხარეები ერთობლივი ძალისხმევით ცდილობენ უცხოელი სტუდენტებისთვის საქართველოში ცხოვრება თუ სწავლის პროცესი მაქსიმალურად კომფორტული იყოს და მათთვის დაუვიწყარ მოგონებებთან ასოცირდებოდეს, სამომავლოდ კი აღნიშნული თანამშრომლობის გაფართოება იგეგმება.

„საერთაშორისო განათლების ცენტრი“ (IEC – International Educational Center) ქართულ ბაზარზე ახალი კომპანიაა, რომელიც წარმატებით ახორციელებს საქართველოში უცხოელ სტუდენტთა რეკრუტირებას.კომპანიის გამოცდილი და მაღალკვალიფიციური გუნდი საქართველოში სწავლის მსურველებს მრავალფეროვან მომსახურებას სთავაზობს. IEC-ის ფართო სერვისებს შორისაა: საჭირო დოკუმენტაციის მომზადება; კონსულტაცია საგანმანათლებლო პროგრამებსა და იურიდიულ საკითხებზე; ტრანსფერი აეროპორტიდან; დაბინავება (სასტუმროში ან სხვა შერჩეულ ადგილზე); ტრანსპორტირება; ბინადრობის ნებართვა; დაზღვევა.

ამ ეტაპისთვის, კომპანია საქართველოში სწავლის მსურველთა რეკრუტირებას ახორციელებს გაერთიანებული ემირატებიდან, ეგვიპტიდან, იორდანიიდან, ლიბანიდან, ბანგლადეშსა და უკრაინიდან. აღსანიშნავია, რომ იორდანიის მიმართულება დღესდღეობით განსაკუთრებით აქტუალურია.

კომპანია უცხოეთიდან ჩამოსული ახალგაზრდების მაღალკვალიფიციური განათლების მისაღებად კავკასიის საერთაშორისო უნივერსიტეტთან ერთად საქართველოში ავტორიზებულ სხვა უმაღლეს საგანმანათლებლო დაწესებულებებთანაც თანამშრომლობს.