კავკასიის საერთაშორისო უნივერსიტეტის მედიცინის ფაკულტეტის სტომატოლოგიის პროგრამის მეოთხე და მეხუთე კურსის სტუდენტებმა ქ. ზუგდიდის მე-5 საჯარო სკოლის დამამთავრებელი კლასის მოსწავლეებისთვის ჩაატარეს ტრენინგი თემაზე: „პირის ღრუს ჯანმრთელობა და ჰიგიენა“.
ტრენინგის დაწყებამდე სტუდენტებმა მოსწავლეებს გააცნეს უნივერსიტეტის აკრედიტებული პროგრამები, სტუდენტური თვითმართველობის მუშაობა და გაცვლითი პროგრამები. ისაუბრეს იმ ფაქტორებზე, რითიც გამორჩეულია კავკასიის საერთაშორისო უნივერსიტეტი, ასევე, უპასუხეს მოსწავლეების კითხვებს.
ტრენინგი ინტერაქტიული ხასიათის გახლდათ და დატვირთული იყო სხვადასხვა აქტივობით. მოსწავლეებმა მიიღეს ინფორმაცია პირის ღრუს მოვლის ინდივიდუალურ საშუალებებზე სახლის პირობებში, კბილების პროფესიული წმენდის საჭიროებაზე, ბრეკეტ-სისტემის არსებობისას პირის ღრუს მოვლის თავისებურებაზე, ცხოვრების ჯანსაღი წესისა და პროფილაქტიკური ვიზიტების შესახებ, განსაკუთრებული ყურადღება კი გაამახვილეს კვებისა და პირის ღრუს ჯანმრთელობის ურთიერთკავშირზე.
მოსწავლეებმა სხვადასხვა ჰიგიენური საშუალებებით კბილების სწორად წმენდის მეთოდები შეისწავლეს.
ტრენინგს ხელმძღვანელობდნენ ასოცირებული პროფესორი ვერიკო ხუნძაკიშვილი და CIU-ს საბაზო სტომატოლოგიური კლინიკა „დიოდენტის“ ექიმი თერაპევტი ნინო ხვედელიძე.
დასასრულს ყველა მონაწილეს გადაეცა შესაბამისი სერტიფიკატი და სამახსოვრო საჩუქრები.
ტრენინგში მონაწილე სტუდენტებს შეხვდა მე-5 საჯარო სკოლის დირექტორი დოდო ცქვიტაია და სკოლის ადმინისტრაცია. მათ განსაკუთრებული მადლობა გადაუხადეს კავკასიის საერთაშორისო უნივერსიტეტის ხელმძღვანელობას ასეთი მნიშვნელოვანი საგანმანათლებლო პროექტის განხორციელებისათვის და აღნიშნეს სტუდენტების მომზადების მაღალი დონე.
დღის ფარგლებში სტუდენტებმა დაათვალიერეს ქ. ზუგდიდის ღირსშესანიშნაობები, მოინახულეს XVII საუკუნის რუხის ციხე-სიმაგრე, ანაკლიის და განმუხურის სანაპიროები.
ასევე აღსანიშნავია, რომ კავკასიის საერთაშორისო უნივერსიტეტის მედიცინის ფაკულტეტის სტომატოლოგიის მიმართულების დამამთავრებელი კურსის სტუდენტები და სტომატოლოგიის პროგრამის ასოცირებული პროფესორი ვერა ხუნძაკიშვილი შეხვდნენ ზუგდიდის შოთა მესხიას სახელობის სახელმწიფო სასწავლო უნივერსიტეტის წარმომადგენლებს. მათ გამოთქვეს სამომავლო ერთობლივი კვლევებისა და შემეცნებით-საგანმანათლებლო პროგრამების განხორციელების სურვილი. შეხვედრის მონაწილეებმა ისაუბრეს უნივერსიტეტების მიზნებსა და სამომავლო გეგმებზე, ასევე, დაათვალიერეს „პირის ღრუს ჰიგიენისტის“ სასწავლო პროგრამის საფანტომო სწავლების კაბინეტი.
ადრესატი
თქვენი სახელი
ელ-ფოსტა
თემა
შეტყობინება
