გადაცემათა ციკლი „რუსთველის სამყარო - თამაზ კვაჭანტირაძე“ ოცდაერთი რეგიონული ტელევიზიის ეთერში გავა.
კავკასიის საერთაშორისო უნივერსიტეტის მულტიმედია ცენტრის ბაზაზე მომზადებული დოკუმენტური ფილმები, რეგიონულ მაუწყებელთა ასოციაციის მხარდაჭერით, ქვეყნის სხვადასხვა კუთხეში მცხოვრები აუდიტორიისთვის ხელმისაწვდომი მომდევნო კვირიდან გახდება.
მთლიანობაში, ციკლი რვა გადაცემისგან შედგება. მათგან პირველი ორი "ვეფხისტყაოსნის" დაწერის ეპოქას, შოთა რუსთველის ბიოგრაფიას, დღემდე შემორჩენილი ხელნაწერებისა და ილუსტრაციების შესახებ ცნობებს მოიცავს. დანარჩენი ექვსი კარი კი შემდეგ აფორიზმებს ეხება: "რასაცა გასცემ, შენია, რაც არა, დაკარგულია!", "სჯობს სახელისა მოხვეჭა ყოველსა მოსახვეჭელსა", "სჯობს სიცოცხლესა ნაზრახსა სიკვდილი სახელოვანი!", "არა ვიქმ, ცოდნა რას მარგებს ფილოსოფოსთა ბრძნობისა?!", "ლეკვი ლომისა სწორია ძუ იყოს თუნდა ხვადია!", "ბოროტსა სძლია კეთილმან, არსება მისი გრძელია".
მულტიმედია ცენტრმა გადაცემათა ციკლი შოთა რუსთველის 850 წლის იუბილეს მიუძღვნა.
აღნიშნული პროექტი რეგიონულ მაუწყებელთა ასოციაციისა და კავკასიის საერთაშორისო უნივერსიტეტის მრავალწლიანი თანამშრომლობის ნაწილია. მხარეთა ურთიერთთანამშრომლობა სტუდენტთა სტაჟირებას, სხვადასხვა საგანმანათლებლო და მედიაპროექტებს მოიცავს.
ადრესატი
თქვენი სახელი
ელ-ფოსტა
თემა
შეტყობინება