დებატები

"ჩრდილო ატლანტიკურმა ალიანსმა - ნატომ, ტერორიზმთან ბრძოლაში თავისი ძალები ამოწურა’’ - ეს არის რეზოლუცია, რომელზეც პროექტის - „სტუდენტური ცხოვრება 2016-ის" ფარგლებში, კავკასიის საერთაშორისო უნივერსიტეტის სტუდენტების - ეკა პაპუნაშვილისა და დემეტრე ლომაძის ორგანიზებით "დებატები" გაიმართა.

აღნიშნულ აქტივობაში ერთმანეთს ორი გუნდი - მტკიცებითი და უარყოფითი - დაუპირისპირდა. მტკიცებით გუნდს ბაკურ ხუბულავა, დემნა შონია და გელა ფიცხელაური წარმოადგენდნენ, ხოლო უარყოფით გუნდს - ნინო ფილფანი, ჯემალ კონცელიძე და სალომე ზურაბიანი.

დებატები კარლ პოპერის პრინციპით ჩატარდა.

მონაწილეთა შეფასებისას ყურადღება ორატორულ უნარ-ჩვევებზე, რეზოლუციასთან დაკავშირებული მყარი არგუმენტაციის წარმოდგენასა და მოწინააღმდეგე მხარის არგუმენტების გაბათილებაზე გამახვილდა.

შეხვედრის ბოლოს გამარჯვებულ გუნდთან ერთად, რომელიც მტკიცებითი გუნდი გახდა, საუკეთესო სპიკერიც გამოვლინდა, ეს წოდება ბაკურ ხუბულავას ერგო.

შეგახსენებთ, რომ პროექტის -„სტუდენტური ცხოვრება 2016-ის"- ფარგლებში გამარჯვებულები „სტუდენტურ დღეებზე" კავკასიის საერთაშორისო უნივერსიტეტის სახელით წარსდგებიან.

პროექტის შემდეგი აქტივობა 8 აპრილს, 18:00 საათზე, კსუ-ს საკონფერენციო დარბაზში (ოთახი №305) მხიარულთა და საზრიანთა გუნდებს შორის გაიმართება.