15 იანვარს თბილისის ოლიმპიურ სასახლეში ,,ა“ ლიგა ოფიციალურად გაიხსნა და უახლოესი სამი თვის განმავლობაში, სუპერლიგაში გადასასვლელად კსუ-ს საკალათბურთო კლუბთან ერთად, კიდევ ხუთი გუნდი იბრძოლებს.
ექვსი გუნდი ერთმანეთში ორ წრედ ითამაშებს და მათგან საუკეთესო ოთხი გუნდი, რომელიც მომავალი სეზონის “ა” ლიგის საგზურს შეინარჩუნებს, პლეი ოფში გადავა.
“ა” ლიგის პირველი ტურის თამაშში, კსუ-ს საკალათბურთო კლუბი, ,,თბილისს“ შეხვდა. სერბი სპეციალისტის - ბოიან სალატიჩის გაწვრთნილმა კალათბურთელებმა, დამაჯერებლად ითამაშეს, მეტოქეს შანსი არ დაუტოვეს და თამაშის ოთხივე პერიოდი თავიანთ სასარგებლოდ დაასრულეს. (22 : 19; 31 : 20; 20 : 9; 20 : 14;)
შეხვედრის საბოლოო ანგარიში 93:62 კსუ-ს სასარგებლოდ დაფიქსირდა. გუნდს ამერიკელმა ლეგიონერმა - ვენდილ ლუისმა 20 ქულა მოუპოვა, ნიკა ღონღაძის ანგარიშზე 8 მოხსნა დაფიქსირდა, ხოლო ბექა წივწივაძემ თამაშის მანძილზე 6 პასი ჩაიწერა.
თამაშს კსუ-ს მხრიდან, ხელმძღვანელობა, ადმინისტრაციის თანამშრომლები, სტუდენტები და სხვა დაინტერესებული პირები ესწრებოდნენ.
შეგახსენებთ, რომ 28 დეკემბერს, კავკასიის საერთაშორისო უნივერსიტეტის საკონფერენციო დარბაზში, საქართველოს ეროვნული საკალათბურთო ნაკრების ყოფილ წევრ, ევროლიგის წარმატებულ ვეტერან კალათბურთელ - ვიქტორ სანიკიძესა და უნივერსიტეტს შორის, თანამშრომლობის მემორანდუმი გაფორმდა. ამ მიზნით, გადახალისდა გუნდის შემადგენლობაც: კსუ-ს სტუდენტების მხარდამხარ გამოცდილი, უმაღლესი კლასის ქართველი და უცხოელი კალათბურთელები ითამაშებენ.
კსუ-ს გუნდმა ,,ა“ ლიგაში ადგილი, საკვალიფიკაციო ეტაპის გადალახვის შედეგად, გასულ წელს მოიპოვა და სადებიუტო სეზონი მე-4 ადგილზე დაასრულა. სწორედ ამ ლიგიდან გააგრძელებს ახალი მენეჯმენტით დაკომპლექტებული კსუ-ს კალათბურთის კლუბი ასპარეზობას და უმაღლეს ლიგაში მოსახვედრად იბრძოლებს.
ადრესატი
თქვენი სახელი
ელ-ფოსტა
თემა
შეტყობინება