5 მაისს, კავკასიის საერთაშორისო უნივერსიტეტის საკალათბურთო გუნდმა 2018-2019 წლების სეზონი დაასრულა.
საქართველოს საკალათბურთო ჩემპიონატის „ა“ ლიგაში კსუ-სთან ერთად ხუთი გუნდი მონაწილეობდა: „ვერა“, „მეგა ბასკეტი“, „არენა-ორბი“, „აფხაზეთი“, და „თბილისი“.
გუნდის გამოსვლაში მენეჯერული დებიუტი ჰქონდა საქართველოს უახლესი საკალათბურთო ისტორიის ერთ-ერთ ყველაზე გამორჩეულ ქართველ კალათბურთელ ვიქტორ სანიკიძეს, რომელმაც გუნდის ჩამოსაყალიბებლად მოიწვია სერბი მწვრთნელი ბოაიან სალატიჩი, ხოლო უნივერსიტეტის სტუდენტებისა და ახალგაზრდა კალათბურთელების მხარდამხარ სათამაშოდ 3 უცხოელი ლეგიონერი და რამდენიმე გამოცდილი ქართველი კალათბურთელი შეკრიბა. თუმცა, სეზონის დასაწყისი არც თუ სასიამოვნო აღმოჩნდა - ტურნირის დაწყებამდე რამდენიმე დღით ადრე ვარჯიშის დროს დაშავდა გუნდის ლიდერი, ამერიკელი ლეგიონერი რაიან აარონი და სეზონი სრულად გაუცდა. მიუხედავად ამ სამწუხარო ფაქტისა, გუნდმა გათამაშების პირველი წრის ხუთივე თამაში დამაჯერებლად მოიგო, ხოლო საბოლოოდ 10 გამართული მატჩიდან კსუ-მ 8 შეხვედრაში გამარჯვება მოიპოვა და რეგულარული ჩემპიონატი პირველ ადგილზე დაასრულა, რაც უდაოდ დიდი წარმატებაა განახლებული გუნდისთვის.
რეგულარული ჩემპიონატის დასრულების შემდეგ, კსუ-ს გუნდმა ნახევარფინალში 2:1 დაამარცხა „არენა-ორბი“, თუმცა, სუპერლიგაში გადასასვლელ პლეიოფში „ვერასთან“ სერია 1-3 დათმო, ხოლო დამატებით საკვალიფიკაციო რაუნდში სუპერლიგის ბოლოსწინა ადგილზე გასულ გუნდ „კაკტუსთან“ უშეღავათო ბრძოლაში 2-3 დამარცხდა.
კსუ-ს ადმინისტრაცია და სტუდენტები მთელი სეზონის განმავლობაში აქტიურად გულშემატკივრობდნენ საკალათბურთო გუნდს, რომლის წარმატებასაც და წარუმატებლობასაც ერთობლივად იზიარებდნენ.
კსუ-ს ადმინისტრაცია მადლობას უხდის კლუბის სრულ შემადგენლობას. წარმატებას უსურვებს გუნდს და თითოეულ კალათბურთელს.
ადრესატი
თქვენი სახელი
ელ-ფოსტა
თემა
შეტყობინება
