არასამთავრობო ორგანიზაციების საექსპერტო შეფასებები კონფლიქტების მშვიდობიან ტრანსფორმირება-მოგვარებაში

სასტუმრო „ქორთიარდ მარიოტში“ პარლამენტის ტერიტორიული მთლიანობის აღდგენის საკითხთა დროებითი კომისიისა და საგარეო ურთიერთობათა კომიტეტის გაერთიანებული სხდომა ჩატარდა, თემაზე: „არასამთავრობო ორგანიზაციების საექსპერტო შეფასებები კონფლიქტების მშვიდობიან ტრანსფორმირება-მოგვარებაში“.
შეხვედრას კავკასიის საერთაშორისო უნივერსიტეტის ლექტორი, სამხრეთ კავკასიის რეგიონული უსაფრთხოების ინსტიტუტის დირექტორი, ალექსანდრე რუსეცკი ესწრებოდა, რომელმაც სიტყვით გამოსვლისას ყურადღება კონფლიქტების მართვაზე, უსაფრთხოებაზე, სამხედრო და საუნივერსიტეტო დიპლომატიაზე, პროექტზე _ „ეუთოს ახალგაზრდული ქსელის მშენებლობა საქართველოში“, სამოქალაქო საზოგადოების ინსტიტუტის განვითარებასა და დიასპორულ საკითხებზე გაამახვილა. ალექსანდრე რუსეცკიმ ასევე კავკასიის საერთაშორისო უნივერსიტეტის სტრატეგიასა და მის პოლიტიკაზე ისაუბრა.
სხდომას აღმასრულებელი ხელისუფლების წარმომადგენლები, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, სამხრეთ ოსეთის ადმინისტრაციის ხელმძღვანელი დიმიტრი სანაკოევი, პარლამენტის ტერიტორიული მთლიანობის აღდგენის საკითხთა დროებითი კომისიის თავმჯდომარე გიორგი ვოლსკი, პარლამენტის საგარეო ურთიერთობათა კომიტეტის თავმჯდომარის პირველი მოადგილე ზვიად კვაჭანტირაძე, სახელმწიფო მინისტრის მოადგილე შერიგებასა და სამოქალაქო ინტეგრაციის საკითხებში ქეთევან ციხელაშვილი და საქართველოს სხვადასხვა რეგიონში მოქმედი 60-ზე მეტი არასამთავრობო ორგანიზაციის წარმომადგენლები დაესწრნენ. შეხვედრაში, კავკასიის საერთაშორისო უნივერსიტეტის ბაზაზე არსებული არასამთავრობო ორგანიზაციის სახელით, კსუ-ს სტუდენტები: ნინო ირემაშვილი და ხატია თანდილაშვილი მონაწილეობდნენ. ღონისძიება გაეროს განვითარების პროგრამის მხარდაჭერით მოეწყო.